到步後諗住訓機場大堂啦，隔兩個凳有一個扶手位，本身以為真係訓到，有哂耳塞眼罩、睡袋當被、衫袋當枕頭。點知真係俾個扶手位搞到隻腳無位好擺。合埋眼徘徊係輕度入睡同清醒之間，咁就過左5，6個鐘。
2000蚊遠傳學生plan電話卡，4G無限上網兩個月，應該算抵，速度幾快。之後視察下點係機場行出去，發現只可以兜返上去先可以行到落去，但凍到痴線著住短褲連條路點搵都唔係好想諗，所以都係算，搭36蚊巴士出桃園市區做起點啦，有機會兩個月後返桃園先行個條路。
日頭係機場出面真係凍到傻，又大風，心諗帶唔夠保暖。不過去到市區又無咩風，行行下仲覺得好熱，太陽又猛，幾好，起碼唔會凍死先。
落車行左陣就掛起張環台牌，雙手持杖，越行越熱。行左三幾個鐘，中途求其去左一間牛肉麵館食麵飲可樂醫肚，130蚊，除左隻辣椒之外唔係好岩口感同味道。
之後繼續行，雖然呢到人好少，但偶爾都有人覺得驚喜，「啊，徒步人啊」。仲拒絕左一個女仔既便車 ，幾靚，如果而家係夜晚我可能會問可唔可以去你到訓 (佢隔離坐左個呀媽係到)。到而家坐左係一間叫健身工廠既gym。又大又有冷氣又有梳化，休息下，其實我好想成個人訓哂上去，真係好眼訓。
坐坐下真係訓著左，大概訓左有十幾分鐘，終於俾人趕走左。咁好啦，繼續上路，而家就快到中正公園，係一間七仔坐緊。
行經一間清心福，店員送我一杯飲極都飲唔完既凍奶茶，飲既係味道，又係人情味。之後去到中正公園坐，見到好多叔叔嬸嬸後生仔係到捉pokemon。對住中間棵大樹畫左幾筆記低今日check point。同溜狗阿姨聊左幾句就繼續行。不過都係想搵下間派出所同小學，大概會係今晚落腳既地方。跟住就周圍兜下，係M記坐低畫下塊布，hea等7點半鐘，網友收工請我食個便飯，接個風。
如果今晚可以係中壢派出所過夜，今日只係行左10公里左右，可能以前曾經試過揹過更重，今次用雙杖加上無數人既鼓勵，感覺良好。老實講我都知70L背囊咁重真係盞揹，但我無細少少又輕少少既無架背囊，又無理由買多個為左呢次行程，所以都係算，背囊真心仲有好多空位，覺得重行起上黎到時都會選擇掉定唔掉，或者寄返香港。對於部單反，暫時都未有後悔帶，呢層我真係諗左好耐，夢想之一，我唔想後悔無帶多過後悔帶左。對我黎講幾輕幾重都唔重要，重要既係夢想，而我亦都有啲野想係旅途中做，之後會講 (如有人睇)。
差唔多夜晚十點，我又返返去中壢中正麥當勞坐，呢到真係好，有長梳化，有廁所，有電充，無人趕既話呢到其實係天堂，希望今晚可以係到訓啦。岩岩7點9左右Ossy突然到左，佢係桃園收工突登坐大巴黎，半個鐘車程。Ossy係背包客棧主動加我Line既30幾歲好爸爸，以前有沙發衝浪同工作假期既經驗，請左我食左餐飽既Curry House。其實台灣野食真係唔岩我口味，但今日終於有飽肚既感覺。Ossy (無圖，我話同佢影張相佢話害羞)係一個好好既爸爸，同我老母既價值觀完全相反。佢話廿歲後既仔女就由得佢做咩都好，除左吸毒，因為仔女唔係教出黎，係放手由佢地經歷體驗返黎。一路食飯一路傾左差唔多兩個鐘，就送左佢上車走，有緣會再見。
唉，就係呢刻，離我幾尺遠訓緊覺既阿叔俾經理趕走左話「這裡不可以睡覺哦，不然我叫警察哦。」心知不妙啦，今晚都係要去第二度落腳。
而家差不多凌晨12點，set好哂liner睡袋著淨條孖煙通係梳化準備訓教。真係好運，去左中壢派出所問可唔可以借宿一晚，兩個靚仔肯，仲問我要唔要食麵同充電。只係話沖涼應該唔得。唔緊要啦已經，刷牙洗襪洗衫洗底褲換底褲再用濕紙巾抹下面同袋底已經好滿足。
認真買㗎手拉車放個背囊入去拉。 好多徒步都咁做，唔係之後去到南/東面要帶多啲水/乾糧就重到pk
