然後佢就開始屌我，話我離地，講說話好難聽。「大學生都話失業，咁你話冇大學學位嘅咪食得屎？」我好衰唔衰，駁咗一句：「咁唔通我大學畢業去做麥當勞咩⋯⋯」佢又話：「我夠知你大學畢業可以搵份好少少嘅工，唔需要做麥當勞，（萬一我搵唔到呢？我最後咪可能又要搵麥當勞⋯⋯）咁你咪守下先囉，大學生，我唔信冇人請！讀咁多書讀到你講嘢咁刻薄，我已經四十幾五十，我知講叻我一定唔夠你叻，一定冇咩發圍，你大學生同我講冇人請？做人唔該謙虛啲⋯⋯」我聽到呢到，我已經冇心機再聽落去，亦冇再駁落去。
我想講，成日有好多大公司嚟學校搞 career talk，有邊個唔想入大公司？有邊個唔係想搏入 Scheme A？我自己知自己事，我讀書唔係太叻，成績中規中矩，如果講 screen 人，我自己都冇信心可以唔洗俾人 screen 走。今年我真係好迷惘，以前係唔係拎住大學學位就有人請我唔知，但係依家一街都係大學生，我覺得大學學位只係搵工嘅必要條件之一，但唔會保證最後搵到一份好工。我知道工程系已經叫比較好環境，文科嘅出路會更窄，我亦知道我係屋企入面少數嘅大學生，但係我冇因為大學生呢個身份而自負，亦冇打算話在座各位唔係大學生嘅親戚都係垃圾，我話「畢業變失業」，只係因為我呢排壓力好大加上對自己嘅前途感到迷惘而感嘆，咁都可以俾人話我「自大」、「刻薄」云云。
佢最後講咗一句：「嗱，我都係為你好，不過你聽唔聽得入就另一回事，反正我同你都不嬲都冇兩句。」
咁認真