【預賀Lihkg滿月之喜】雲南雨崩圖文分享

雲南雨崩

香格里拉德欽縣的一條村莊，位於梅里雪山山下，要攀登梅里雪峰卡瓦格博峰，必須由此出發。

梅里雪山有13峰，主峰—卡瓦格博峰亦稱為太子峰，為藏民最尊敬的神山之一。

長久以來，很多高山攀登者都想征服卡瓦格博峰，但很不幸地，至今還沒有人能成功登頂，1987年一次登山意外中，雪崩做成17人死亡，大部份是日本人，之後中日登山隊還組合了一次登頂活動，卻因天氣及其他原因下放棄了。

有興趣可以自己網上Search，第二次登頂過程經過真係好似電影情節，另外唔知依家仲搵唔搵到，一套卡瓦格博的DVD，就係講第一次嚴重雪崩果次。(以前在德欽飛來寺既食店都會有得播)



攀登活動受到當地藏民的嚴重反對，後來當地政府決定禁止所有人再攀爬此峰，至今卡瓦格博還保留着處子之身。

有一個傳說，梅里雪山不喜歡日本人，每逢有日本人在，就不能看到梅里雪山，厚厚的雲霧會把卡瓦格博峰包圍着。

要去雨崩，必須從香格里拉坐車到德欽縣，再由德欽縣城出發，有兩條路可以走，一是經老路由西當溫泉上山，經南棕椏口到達雨崩村，另一條路線是尼農橋過江再經那邊上雨崩。

前者要包車到西當溫泉，由海拔2600米去到海拔3700米的南棕椏口，再下山到達海拔3100-3200米的雨崩村，後者方法，我只係回程試過，雨崩經尼農出，過尼農橋，預先約好車接送去德欽，尼農海拔約2000米。

梅里雪山 (拍自第2次去雨崩)


卡瓦格博峰 (拍自第2次去雨崩)

這次是我第3次入雨崩，也可能是最後一次，對雨崩的商業化已經感到失去興趣，純樸藏民已經不存在了。

這次沒有太多時間，所以由香港到達昆明後，即晚坐臥鋪巴士直入德欽。


昆明至麗江一段路還可以睡覺，但之後就不能了，路實在太爛，完全睡得不好，應該說不能入睡才對。

這巴士，在麗江又停很久，在香格里拉又停很久，結果比正常慢了3個多小時才到達德欽。

經過納帕海，這冬天季節也難得水量那麼豐沛。




在奔子欄附近會留下讓人吃飯，人地正常係朝早九點去到，我就中午先到，呢餐都幾貴下。



今年冬天雪量不算太多，白馬雪山一段路鋪雪不算嚴重。





坐佐成廿個鐘，終於見到梅里雪山了。


到達德欽，因為無乜遊客會揀昆明直接坐車去德欽，所以我呢個鐘數到，完全夾唔到人包車去飛來寺。(要睇梅里日照金山都會揀住飛來寺，同埋入雨崩都會在飛來寺出發)

結果我只好一個人在街上包車過去。(其實只係幾十元)

住宿揀番之前住過既地方，不過依家又轉佐名，叫做守望6470，6470是卡瓦格博峰的海拔高度。


搵住宿果陣，司機有建議過，不過通常我都係自己話事，飛來寺有間YHA青旅，但係在小山上面，出入不方便，同埋價錢不算平，因為我唔會住床位，如果住房就會貴過住其他地方，另外我去旅行無強迫症一定要住青旅。

飛來寺


其實呢次嚟飛來寺都有好大變化，馬路旁建了一個好大的觀景台，完全把以前的地貌改變了，我連紀念1987年中日登山災難的紀念碑也找不到了。

早上日出前便要起床看梅里金頂，德欽海拔高度3250米，和香格里拉3200米差不多，如果想去雨崩的朋友，最好預多點時間停留香格里拉及德欽，先適應高海拔，對減少之後的高山反應很有幫助。

冬天飛來寺的水管在晚上會結冰，晚上和早上會在零度以下，日頭有太陽才回暖。

我住的守望6470有床位或套房出租，我住的是套房，公眾洗手盤的水管都結冰了，幸好我房間的水管沒結，還可以有水洗臉刷牙。

早上出去拍照，手套也要帶上，因為觀景台風很大，吹一陣手指都會僵硬。

梅里金頂兩張




影完金頂便回去食早餐及收拾背囊，每次我都會把在雨崩不需要用的東西寄存在住的地方，盡量減重才入雨崩，否則在入雨崩徒中，會好想將啲嘢扔晒佢。

在飛來寺當時都遇到其他準備今天入雨崩的遊客，不過他們包的車沒空位，我
只能照原定安排，坐昨天約好的小型麵包車。

昨天包車到飛來寺的時候，跟司機約好今天會包他的車，但最後他因為接了一單回香格里拉的生意，把我的生意交給另一個女人了。


我比另外那班人還早些到西當溫泉，但我不想一個人入去，所以等埋佢地，結果就累埋佢地。

因為有條友嘈嘈閉，自己踩到啲冰跣親，又話我亂帶佢行，咁條路有冰都無人知架喎，結果嘈到我之後揀佐條易行既路，但係條路唔係啱果條路，啱果條係一開波就狂上斜，呢條係通唔到上山，最後係由樹林上山，爬佐好耐先搵番原身條路，個個都搞到手損面損，攰到九彩先上到去，日落先到椏口，最後係搞到天黑晒先入到雨崩。
最後決定住邊，大家都沒頭緒，我就好想住徒步者之家，因為之前兩次都係住呢度，第二次仲住佐4晚，仲同屋住Frd佐。

不過呢次入到去雨崩，條村好多地方整梗，起梗好多路，天黑晒根本認唔到路去徒步者之家，後尾竟然見到有電單車行，開住電單車個後生仔，我地截停佐問佢點行去徒步者之家，咁佢話自己係徒步者之家老板。

入村要付人頭費，好多人都話可以在住宿費扣，但係問徒步者之家呢個佢就話無得扣，結果成班人都決定唔同佢住，條友個款仲要寸寸貢。(我地加加埋埋有7個人，廣東話佔佐5個，其他講鳥語)

最後揀了冰湖之家，上次嚟都係經過無住過，估唔到呢度有機會住。

Lm

個金頂靚到
親眼睇到應該不枉此生

補番一張下晝五點幾在椏口附近影既卡瓦格博峰側面既相。


第二朝早上的雨崩內的日照金山




由於尋日個個都虛耗大量體力，所以今日大家都揀行比較近又短時間的神瀑。

去神瀑要過雨崩河經下雨崩入去，向着五冠山入去。


經過尋日行錯路，但佢地竟然唔識死，去神瀑又叫我帶路，後來有個當地o靚仔，尋日入雨崩果陣，好似睇中佐我地其中一條女，今日佢又出現，結果最後由佢帶路，咁我就鬆一口氣，其實我都無咁好力行得咁快可以帶路。

仆晒街，呢次我真係包尾大幡，佢地上到神瀑尾，我都仲未到，原來今日神瀑有祭祀，好多村民都入佐去，又打鼓又唱歌，好熱鬧，但係我行得摩，睇唔到。

因為冬天神瀑無水，但係上面就好多冰跌落嚟，可能村民祭祀果陣太嘈。


神瀑風光








大家都係等我上到頂先回程，回程就好快，始終落山無咁辛苦卦。

但返到冰湖之家，發現唔見佐3個，一個女仔加個福建仔同埋另外有一個本來係同另一班早一日到既人一齊既大叔，今日佢跟佐我地行神瀑。

最後原來是那大叔膝頭哥痛，落山好慢，幸好今天神瀑有祭祀，上面的小店有開門，有一個村民最後和他們一起落山，否則都不知他們怎認路回來，他們連電筒都無個，電話又無電，我想去搵佢地都無咁既體力再由中雨崩落番下雨崩。

結果等佐兩個鐘佢地先返到，我地都等埋佢先點菜食飯。

後記：
今日再睇番呢件事，如果唔係我尋日帶錯路，搞到大家入去雨崩果陣用多咁多體力，本身果日就會行大本營+冰湖，唔係去神瀑，如果係咁既話，神瀑再過一日先去，就會撞唔到村民拜神瀑，咁落山就唔會有村民陪着佢地返嚟，真係好玄。(已經唔係第一次，我第二次去雨崩果陣都試過，之後會再講。)

今日出發去大本營+冰湖，有我地本身7個再加多1對來自華中的情侶，情侶中的女生又係識廣東話既。

呢次就正正式式請佐個響導，仲會幫啲女仔拎下野，今年冬天啲雪落得唔多，好薄唔厚，行既路可能多人踩，係無乜雪果隻，反而有機會有層薄冰會好跣。

我着高筒爬山鞋就可以直接踩落路旁既雪，咁就唔會跣，但雪又唔會深到入到對鞋。

上山一段，響導見到好遠棵樹見到有隻白色貓頭鷹，竟然被佢用椏叉
用石頭射佐落嚟，成隻死佐。(應該屬受保護架)

用佐3個鐘就去到大本營，除佐椏口一段厚雪啲之外，其他地方都無乜雪，想玩雪就失望了。


上冰湖一段路


望山跑死馬，兩次入雨崩都只係去到大本營無上到冰湖，睇落好近，結果行多成個鐘先上到冰湖個椏口。


最後都係停在椏口，啲女仔就玩自拍，無人肯落去冰湖，因為睇到之前另外班人落佐湖面，見啲人都好細粒，覺得都好遠下。


本來聽講落到冰湖上，係可以沿原來條河可以出番去，但係響導話無行過唔敢帶我地行，結果只可以原路走，咁就更加無人肯落湖面，因為行番上嚟都唔係嘢少。


離開大本營


最後我地下晝五點半就返到冰湖之家。

今晚就大家一起決定聽日點走法，七咀八舌最後決定請響導帶路行尼農出，過尼農橋坐約好既包車返德欽，順便買埋第日既回香格里拉巴士票。

講下每晚點食飯？

叫餸，如果有肉既就會貴啲 (貴成倍有多) 齋得菜既就平好多，另外湯又另計，但通常都係得蕃茄同雞蛋，但湯一定要叫，呢啲地方既米唔靚同埋煮出黎都幾硬下，唔撈湯一定食唔晒，食得少就更加無力行。

咁我地就通常大家一齊夾一個數，籌夠期就計可以叫幾多個湯同埋餸，肉貴所以通常都係叫得一個，寧願叫多幾個菜。

今日請佐個響導回程返去，頂佢個肺丫，遲佐成個鐘頭都唔出現，追佐好耐先追到佢嚟接我地。

佢講明齋帶路唔會拎野，咁都OK，你講到明既話無理由屈你拎。

經尼農呢段路都幾多分岔路，唔識路好易行錯，諗著請個響導會好啲，點知佢自己原來係帶隻驢出去買貨，本來都唔算慢，但最後佢竟然食兩家茶禮，另外幫人帶一班鬼佬出去，隻驢仲幫人揹野，佢仲要行得好慢。

結果，我地成班人比佢拖慢晒，去到好多位都要等埋佢嚟到教佐路先再行。

中途有間石屋可以買食同飲既，可以有杯麵沖，我地就喺呢度充饑，食我地既午餐。

最後由雨崩河引水去西當的引水道行，雖然再冇分岔路，但係在無響導下，結果最後大家都行過籠，枉行20分鐘路程，用多20分鐘行番轉頭。

過尼農橋




過橋後，便馬上有車接我們返德欽，我地先去德欽巴士站買車票先，點知第二日唔知咩日子，全日既班車全部做晒包車，全日無車返德欽，你要走就只能自己包其他車出去。

最後先返飛來寺再決定，我住番之前住既守望6470，連帶之前住青旅既其他人都過埋嚟住，因為佢地果邊之前住又無熱水又停電，所以唔返去住。

今晚約好晒司機聽日包車返香格里拉。

早上如常看日照金山，睇完就等麵包車載我地出香格里拉。

呢次 Share五冠峰的金頂。



落香格里拉我地唔係以包車價包，係以人頭計包，點知個司機最後上多兩個客，搞到車尾一排要坐4個，迫到連阿媽都唔認得。(本來3個都好迫)

經過白馬雪山，我地要求落車睇影相，雖然雪不多，但風景依然很美。








金沙江大拐彎起佐個觀景台，要落去就要買票，結果只能離遠咁影，我地同行無賴大叔可以唔理職員衝佐落去，影完相上番嚟都無俾過錢。


奔子欄食飯，包車司機帶我地去一間菜館，一睇個餐牌貴到無譜，結果我地去出面再自己問，原來你跟包車司機去食就要用餐牌價，自己去問就平一半有多，本來十幾蚊，跟餐牌會變四十幾蚊，啲司機食水都幾深下。

順利返到香格里拉，仲要趕得切同日坐車返到麗江過平安夜。(果陣係12月24日)

齋相 share (第二次入雨崩) 因為已經搵唔番原相，所以啲相在網上搵番都好細。

厚雪下的白馬雪山一帶

齋相 share (第二次入雨崩) 因為已經搵唔番原相，所以啲相在網上搵番都好細。

梅里雪山的迎賓台，現在已經行隧道，會經唔到呢度。


飛來寺的白塔，呢個係舊既，依家應該拆佐，用新觀景台白塔代替


1987年中日登山災難紀念碑，日本人名字都被班五毛/糞青刷甩晒。


中日登山災難紀念碑的台


飛來寺舊白塔

齋相 share (第二次入雨崩) 因為已經搵唔番原相，所以啲相在網上搵番都好細。

徒步者之家的早上


大本營路上


大本營






夏天才會有的大本營客棧，冬天連小賣部都無，有時連一個遊客都無。


之前落過大雪，我入嚟時一個腳印都無


雪厚到

齋相 share (第二次入雨崩) 因為已經搵唔番原相，所以啲相在網上搵番都好細。

雨崩看五冠峰


走尼農離開雨崩，再見卡瓦格博


雨崩河


尼農線的懸崖，留意有人在中間行引水道


替我背東西的響導，重既佢都揹晒


瀾滄江




尼農全景

 
除非搵得番屋企唔知邊個Harddisk會有backup，否則都應該無得再更新相片 share。

補下新圖先

上雨崩白塔


五冠峰+下雨崩

正呀屌你

想去雨崩