梁詠琪同西班牙籍老公Sergio喺11年結婚，兩人嘅囡囡Sofia都已經兩歲喇，今年為Sofia開生日會選擇低調舉行，只係得至襯同好友出席，佈置好多都係DIY，連蛋糕都係朋友整。早前GiGi仲透露過，想喺年底追多個。
周汶錡同法籍老公Julien，大仔Jacques都係兩歲，至於細仔Avner就差唔多半歲。為咗紀錄兩個仔嘅成長片段，周汶錡喺ig開咗個page不時update下佢哋嘅新相，用童真去征服fans。
官恩娜就喺前年2月同中法混血牙醫男友Domingo結婚，為咗尊重圈外男友決定，結婚都係低調處理，不過Domingo都好識做，有着中式馬褂影結婚相。同年10月，兩人嘅囝囝BéBé G出世，老公仲親手剪臍帶。
車婉婉喺愚人節宣佈榮升媽咪，為中澳混血老公Jonathon生咗囝囝 Justus。雖然婉婉係高齡產婦，但佢堅持要自然分娩，體驗十級痛。生產當日痛足十幾個鐘，老公全程陪住。
李蕙敏喺2013年喺倫敦同拍拖3年嘅英籍男友Serge Micallef結婚，而黃偉文更充當「代父」，到英國送呢個囡囡出嫁㖭！除咗黃偉文，李蕙敏仲請咗關寶慧做伴娘。
