驅魔少年爛尾？等我一次過話你知近15年既劇情

原post link :
https://lih.kg/2170402

(上一個post之後過左5年，我地既靚女作者終於解左主角身世之謎同養父之謎，我今次會一併update埋)


呢套野出得慢就眾所周知
最過份個陣好似成幾年都無一集


之後又唔知變左季刊定半年刊，總之等幾年都係得幾話比你睇，仲要一話得十幾頁咁


好多人話佢又亂又爛尾，我都當左係，
當我一氣過翻煲200話打後個啲，終於比我發現新天地


原來呢套野最大既問題只係佢出得太慢，啲劇情如果一氣呵成咁睇，成個故仲係好撚正

但佢解核心謎題既215-225呢幾話，啲敘事太過穿插，每個角色用佢視點比一段仔你，時間線又唔順。
最撚慘係你每睇一小段，就要係現實世界等一兩年先有下一段。


正正常常追live咁睇，睇得明就有鬼啦，根本唔可能會記得佢啲伏筆同劇情


講得太多廢話啦，呢套我最愛黎，忍唔住屌多左兩句，下面我會貼翻一次整理好既劇情。

In Short,
我覺得作者係有個完整嘅故事大綱跟住黎寫，唔係邊寫邊作，結果搞到爛尾。
好多位你望翻轉頭，其實係一直有伏筆，而且成個故事係一脈相承，個設定係一致既。
應該唔駛太擔心作者圓唔到個故事。

目前其實已經解左幾個大謎，仲有啲未交代既一次過整合埋

按時間線黎表達係咁：

七千年前既世界曾經有高度文明，諾亞班人本身係活係呢個時代

係某一日，毫無原因咁係世上出現左諾亞口中既「柱」。柱直接帶來左世界既破滅，令諾亞一族深深咁記住左呢份痛苦同絕望。
之後七千年，每一代諾亞覺醒身上都會出現既十字架形狀既聖痕，就係當年柱既形狀。所以聖痕會令佢地痛苦。同埋每一代諾亞都會覺醒十三個。

之後呢一段劇情作者未完整交代。
應該仲有個叫亞當既人，同千年公之間有過約定。
目前只係知千年公承諾左亞當要為世界帶黎最黑暗嘅三日，姐係滅世。同埋千年公身上背負住要對諾亞同亞當償還既重罪。

之後經過左七千年，期間千年公同Heart一直對抗，大家都想消滅對方。
(驅魔少年故事開始前既五十二年前)
係七千年後既某一日，千年公流浪到坎貝爾家城堡附近既山丘大樹上，一臉疲倦無力同悔恨咁流住淚水，之後就將自己一分為二變成左兩個孖生嬰兒。
點解咁做未交代，估計都係同當年對亞當既約定有關。
但係佢分裂既呢一刻，唔知有心定無意，比坎貝爾家既一個少女係附近目擊到。

少女為呢兩個男仔改左名叫馬納同涅亞。並撫養佢地成人。
亦因為千年公既呢次分裂，令每一代覺醒都只係得十三個人既諾亞，多出左一個人，變成十四個人。而呢兩個男仔都無左七千年來既記憶。

呢到有個唔重要既小問題，千年公幾千年來都係第一諾亞。分裂左之後，係計馬納做第一人而涅亞係第十四人。(呢個排序唔知有無寓意)

馬納同涅亞好好感情咁一齊成長左十七年。
(驅魔少年故事開始前既三十五年前)
十七年生活無詳細交代。但重點可以概括如下。
馬納同涅亞係十七年間覺醒左有翻諾亞既記憶。
而涅亞亦認識左瑪莉安元帥。涅亞雖然唔鐘意瑪莉安，但係無可奈何之下接納左佢，仲好信任佢，兩個人成為左協力者。
涅亞認識既另一個重要人物就係上一任既bookman Jr. (拉比既前任），上任Jr. 同涅亞係好友。
而馬納涅亞亦識左羅德，夢之諾亞。

(同樣係三十五年前）
之後因為作者尚未解謎嘅原因，涅亞嘗試去殺馬納，但失敗左。並被馬納反殺。
馬納親手殺左涅亞，仲食左涅亞既肉體。
馬納對於殺害親兄弟呢個行為，充滿內疚，自己都接受唔到自己，最終精神崩潰左。
悔恨既馬納會對住塊鏡，希望搵翻同自己生得一模一樣既涅亞。
呢個時候馬納因為精神崩潰，就自己欺騙自己，話殺死涅亞既只係馬納。而自己因為食左涅亞落肚、肉體已經合二為一，所以已經成為七千年前既千年公，馬納同涅亞已經消失左，再唔存在。
但馬納只係自己欺騙緊自己，佢根本只係馬納。但從此佢以千年公自居，希望將馬納既人格埋葬，亦自此變得失去理性瘋瘋癲癲。

而涅亞係死前已經預見到呢個結局，所以已經搵定一個宿主，將自己嘅諾亞記憶比左宿主，等自己可以係將來再次覺醒。
呢位青年宿主叫做「亞連」，佢只係一個平平無奇既士兵，係戰場上臨死之前遇上涅亞。涅亞以實現亞連既願望為代價，換取亞連獻出身體成為宿主。
涅亞既好友bookman Jr. 亦願意放棄自己書翁繼承人既身份，去守護宿主。等待涅亞復活。

自此涅亞只係保得住屬於佢既諾亞記憶，或者話靈魂，等待覺醒既一天。而佢原來既肉體已經比馬納吞噬左。
宿主同bookman Jr. 亦踏上佢哋兩人既漫長旅程，一邊躲避追殺一邊等候涅亞歸來。

旅程過左十幾年，
(驅魔少年故事開始前約23-25年前）
自主型innocence 追上宿主同bookman Jr. ，要消滅兩人。亞連既左手就係戰鬥既過程中被自主型innocence斬左落嚟。

作者係呢度揭曉左一個關於innocence既設定。
係驅魔少年既世界觀入面，每個人身上都有「螺旋能量」，excatly就係DNA個個螺旋。但呢個螺旋並唔單止係得生物學上既遺傳資訊，佢更廣義地包括左一生人係命運上既所有際遇、吉凶禍福、與他人交織既關係，etc etc 。Innocence 挑選既「適任者」，其實就係一班本身命中注定「會比常人更多被命運玩弄」既人(aka更多螺旋能量既人) ，innocence 由寄生開始，就會一直吸食適任者既螺旋，去獻祭比heart。

理所當然地，因為身為涅亞宿主，亞連身上有大量既螺旋。自律型innocence自然就想上繳
咁大量嘅能量比heart。佢嘅做法亦好簡單，直接殖入一個innocence去亞連斷臂到，強制發動吸收能量。
最後bookman Jr. 犧牲左自己，保護亞連。原理大約就係將自己嘅靈魂同亞連合二為一，令亞連本來就已經海量嘅螺旋再增加，令heart過載無辦法一次過吸收咁多。(書翁一族既血本身已經承載左幾千年來既歷史真相，螺旋量遠超常人）
Bookman Jr. 既計劃成功咗，正在吸收獻祭亞連既innocence 因為過載而hang機、脫離左自律型既控制，亦停止左獻祭，變成一個無反應既大形光球。自律型惟有守護係光球前面，等待回收innocence/再次獻祭。
點知呢一等就係8年。

八年之後，
(驅魔少年故事開始前約15年前）
一直守係光球前既自律型最後等來既係一個從光球中出現既嬰兒。一個左手寄宿左innocence既嬰兒。
佢正想斬草除根之際，嬰兒身上既巨量螺旋能量自行發動護主。
自律型決定改變計劃。既然innocence已經成功寄生係亞連既左腕，咁亞連呢一世人就會源源不絕咁為heart上獻能量，無必要再立刻殺佢。既避免到heart再次於短時間內過載，又可以期待亞連既成長過程可以更進一步增加螺旋能量。
自律型清洗晒亞連所有過往既記憶、並賣左亞連去馬戲團。

至於涅亞既協助者，瑪莉安元帥知道左涅亞已經轉移左佢既諾亞記憶，搵到宿主。
但元帥並唔知道宿主到底係邊個。亦無諗過宿主竟然對唔上年齡，只係一個小朋友。


由涅亞被馬納殺死到依家已經過左二十年，
呢二十年黎馬納一直尋找涅亞。受到太大打擊既佢再一次失憶。只係記得自己好想搵翻孖生兄弟涅亞，再次一齊生活。
無人諗到，明明係20年前已經搵左宿主既涅亞，佢既宿主竟然會係得幾歲既亞連。
順帶一提，後面涅亞覺醒左之後，佢自己都唔明白點解個宿主會係年齡上對唔上。

呢個時候，最先遇上主角既就係馬納。
瑪莉安同夢之諾亞雖然一直監視住失憶既馬納，但兩個人都無發現主角就係宿主。


失憶既馬納係馬戲團遇上左主角。佢好照顧係馬戲團做下人既主角。馬納養既狗仔亦好喜歡主角。兩人一狗短暫地過左一段溫馨既時光。

後來，因為自律型既陰謀，小狗被謀殺死亡，呢個悲劇對兩人都好大打擊。年幼既主角innocence暴走。
暴走既innocence 感應到附近有敵人，自主攻擊馬納。
及時趕到既瑪莉安元帥雖然阻止左亞連殺死馬納，但被攻擊既馬納精神上受到進一步摧殘，自此成為一個完全既行屍走肉。佢連孖生兄弟既存在都再唔記得，身體健康亦愈來愈差。


係離開馬戲團之後，馬納同亞連就雙依為命。幾年後，馬納病死，正確黎講應該係假死左。
失去親人，亞連行差踏錯，製造左惡魔出黎，之後身上innocence覺醒仲殺埋呢個惡魔。

瑪莉安元帥再次出現，拯救左身心都大受打擊既亞連。之後師父佢自然係收左亞連做徒弟。
師父把口話唔在乎亞連，只係想涅亞復活，反正涅亞覺醒後，亞連既思想都自然會被吞噬。
但其實師父個心好在乎亞連。之後就養大徒弟，將佢培養做驅魔師。


咁又過左十幾年。
師父神秘消失，亞連去教團搵師父。
呢度就係成個驅魔少年漫畫故事既開始。

照數翻其實諾亞線既未解之謎得幾個
1. 七千年前，亞當同千年公有咩約定，千年公背負左咩大罪。同埋柱從何來？
2. 七千年後，千年公受左咩打擊要一分為二
3. 35年前，涅亞同馬納因咩原因要自相殘殺
4. 最後就係涅亞同瑪莉安之間到底有咩約定

而教團線既未解之謎就相對無咩咁吸引，主要得幾樣
5.邊個係heart
6. Heart 同紅衣個plan係點
7. 鴉長官同師父有約定會幫師父，但實際個約定係點就未講

其他個啲仲有少少，例如：
8. 咩係大元帥
9. 邊個係教皇
10. 惡魔進化既終點
11. 咎落
等等....

但最後呢幾樣感覺已經唔太重要，隨住故事發展呢啲謎題已經被邊緣化，主線已經放左係諾亞線到

d人名好熟識
係時候重睇了

好有心

仆街 又要重睇了

原來重未完？？

作者唔係病住畫？

完左再睇

不嬲都唔係爛
係作者病姐

你個名

幾時有下季動畫

記得淨係睇到搵師父聯絡人既約定之地就無再追落去

師兄周圍都係女，太多聯絡人了

你係幾多年前睇

上網搵下先 佢搞搞下變季刊都無追
我細個重有買外傳小說

岩岩出動畫個時

入嚟推吓Post

故事設定好複習下，後期經已分唔到d角色邊個打邊個，覺得 level 4 出現之後6就無以為繼，由熱血變左藍調

我都唔記得自己邊個個位停咗冇睇 都唔知點catch up返

等佢再連載先啦
而家睇完好快又唔記得

樓主！我來了！

入左挪亞線之後 亂到仆街
仲要等勁耐先有一集
都唔記得晒

樓主好有心整理 好多回憶番晒黎
唔知獵人完先 定驅魔少年完先

有首奏者之歌好聽到
到e家都哼到幾句旋律出黎