目前Crystal仍活躍於圈內，而Regen雖然做獨立歌手及偶有幕前作品，但事業重心已轉移至飲食業。Regen過往受訪時曾透露做女團只是表面風光：「由我出道到離開，都係冇賺過錢，最後也是畀咗舊錢先走。所以以前有冇人工呢？我們每個月都係有錢嘅，但屬於預支，到最後都係要還返畀公司。」她指做女團時無論接幾多工作都唔夠，最多月薪只得8,000至10,000元，賺埋都不夠抵償公司預支的款項，最後她甚至賠錢提早解約。
她於5年前決定轉行，在長洲開設Cafe，去超市買食材、招呼客人、煮食、收銀等全部親力親為，一個人頂幾個員工。而去年她轉戰工廈，在葵涌開設外賣店，主力做便當以及Crew meal（團餐），同樣繼續一腳踢，每日凌晨就返舖頭準備食材，由於冇同事幫手，她亦試過因為生病而停業一星期。
而Regen近日就貼出一張素顏照，撰文道出創業辛酸，自從開始經營外賣店，她每日都很累，入貨見到數字就好頭痛，更試過入錯貨、畀人呃，Regen表示：「我係一個1KG都搞唔清楚係幾多既（嘅）人，有次長洲店第一次入貨，入一些清潔用品，我入了連我自己都拿不起的一桶漂白水，到依家都唔記得嗰桶嘢有幾重，我剩係知嗰桶嘢我用咗一年；去街市買餸永遠都畀人搵笨，一條魚賣貴一倍以上價錢，返到屋企嚇親屋企人，到依家去街市兩條青瓜開我價十幾蚊我識得走開……」
她續說，以前屋企房間很凌亂，但開店後要學識點執廚房；以往每晚嚴重失眠，現在每晚10點準時瞓覺7點起身，她表示：「舖頭好似幫自己重整人生咁，只係仲係好窮呢樣嘢仲未改變到，同埋累到完全無心機打扮，今日星期日終於有心有力唔係留喺屋企，落咗樓下飲杯咖啡都覺得自己好似一個homeless。不過原來搞咁多嘢，所有嘢都係比自己重組緊搵返個本源。」原來即使從女團成員轉型做外賣店老闆，Regen仍未能脫貧，但也有很多人留言跟她說加油，更有食客指她煮的食物好好味。
