九龍城偕祖雲達斯足校戰青超 麥融斌：有信心長搞
九龍城聯席主席麥融斌（左）及何迪夫手持祖雲達斯球衣合照。（鄧文滔攝）
將會合作派隊參與U14、U16及U18青超賽事的九龍城及祖雲達斯香港足球學院，周四（21日）舉行發布會，九龍城聯席主席麥融斌（Andrew）盼培養球員為九龍城一隊效力，有信心雙方能長遠合作。
九龍城8月初在季前發布會，已經透露將與祖雲達斯香港足球學院，合作派隊出戰U14、U16及U18青超賽事。Andrew是日表示與對方商討後，發現大家青訓理念不謀而合，故促成是次合作：「之前識到祖雲達斯香港足球學院嘅經營者，大家傾咗兩次，發現雙方搞青訓嘅理念好相似，除咗教小朋友踢波，亦着手幫佢哋身心健康發展，好快落實呢個計劃，我哋會派人同佢哋嘅教練合作，早排已經完成選拔，希望培養有潛質嘅人踢U22聯賽甚至一隊。」
Andrew亦坦言暫時不方便透露雙方合約年期，但深信能長遠合作：「祖雲達斯香港足球學院好重視呢個計劃，而且我哋想栽培小朋友上九龍城一隊，一定要啲時間先可以達成目標，所以相信大家喺可見嘅將來繼續拍住上。」
談到合作目標，Andrew期望利用祖雲達斯的名氣，吸引具潛質的小朋友加盟，並運用人脈助他們外流：「得到歐洲大球會嘅品牌同技術支援，會比自己一手一腳做青訓更易起步，同埋有今次合作嘅經驗，將來送球員去意大利搵機會一定易好多。」
至於祖雲達斯香港足球學院技術總監Luca Monti，則盼通過這個計劃，與九龍城一同進步：「九龍城一隊有啲球員會過嚟做助教，為佢哋提供教波嘅方法，所以我哋會一齊努力，培養更多年輕球員。」
