[瑞士] 阿爾卑斯山之飄零燕 遊記

瑞士，真係一個令人「行極都唔厭」嘅地方。雖然物價貴得嚇人，但無論你鍾意大自然、影相、挑戰、放鬆，佢都有你想要嘅嘢。夏天嘅瑞士有齊哂雪山、綠草、瀑布、冰川，日照時間又長，真係行山者嘅天堂

衣
夏天8月嚟講，陰天、落雨、高山會凍，我算好彩成個旅程只有頭兩三日有落大雨，基本上一件厚衫一件擋風擋雨就搞掂。（利申：怕熱多過怕凍）晴天可以熱到30度，真係好熱、太陽超勁最好有防曬，行雪地要有太陽眼鏡。

食
未去已經聽聞又貴又唔好食，所以拎咗好多公仔面同乾糧，自己買餸煮，除咗快餐店一間餐廳都無食過。Coop 燒雞（大約CHF 7-9，半隻）係幾唔錯，差唔多日日都買嚟食，啤酒又係好平，500ML最平CHF 0.6就買到。

住
主要係AirBnB有得煮食嘅地方，都係BOOKING。COM揾。另外夏天係熱門季節，大旅遊景點住宿都幾緊張，Grindelwald我早8個月Book 好多比較平＋好嘅住宿都比人搶哂。一晚大約CHF 180-250，Grindelwald 更貴。

行
是次租車，諗住行程自由啲，好天就去哂一定要去嘅地方，唔好天就揾一啲相對無咁差嘅地方，所以每一晚都Mon住天氣預報。租車其實都好貴，加埋泊車費（Grindelwald Terminal 泊4-24小時 盛惠CHF 15）、油錢，未必夠Swiss Travel Pass平，而且瑞士山路彎多路窄又多單車。

大約行程如下：


首先利申先，差唔多全部日子都係行山，或者係座山Hea，無睇博物館、歷史建築、藝術、大城市 不論長短，列哂啲地方出嚟先：
1. Ebenalp 懸崖餐廳
2. Pizol 五湖
3. Stoos Ridge Hike （Klingenstock – Fronalpstock）
4. Mt Rigi
5. Rhonegletscher
6. Aletschgletscher、Eggishorn
7. Matterhorn Glacier Paradise
8. Gornergrat、Matterhorn 五湖
9. Glacier 3000
10. Aiguille du Midi 、Montenvers Ice cave
11. Oeschinensee
12. First、Bachalpsee
13. Jungfraujoch
14. Mt Pilatus

Coop 燒雞瑞士名物

Ebenalp 懸崖餐廳
Zurich Airport落機、攞車，係機場附近不斷行錯路，先到第一站萊茵瀑布，好大雨打完卡就走人。如果唔搭艇仔去到瀑布中間嗰個位，都真係唔知仲有乜好做


從 Wasserauen 坐纜車上山


都仲係落雨，行程簡單啲就算，如果唔係呢度都有幾條行程適中嘅山徑。係山頂吊車站沿住山徑落山，穿過一個都幾大嘅山洞後，沿住懸崖邊嘅山路行，好易行


好快就到懸崖餐廳


仲有山羊


打完卡就行回頭路搭吊車落山，去今晚住宿地點，因為呢日係星期六，超市好多都收早，最近嗰間收5PM，結果要揸車去另一個鎮嘅超市（收6PM）買兩日嘅食糧（星期日好多超市都唔開！）

唔好天嘅瑞士山區就係咁，乜景都睇唔到（不過至少仲睇到個懸崖嘅...），又無乜嘢可以做，除咗入餐廳 Cafe Bar 食嘢飲嘢Hea 消磨時間，嚟瑞士天氣因素太過重要！方圓N公里嘅景點都係差唔多天氣，想轉場都轉唔到

樓主去幾多日啊
十月去 希望天氣好

Pizol 五湖
比較冷門嘅地點，至少完全唔覺有亞洲人，不過可能係因為今日天氣差到仆街（其實都係最後落山先開始落大雨）

先嚟地圖，全程大約10KM，攀升約640米，下降約1000米，官方話要大約4小時，將呢個時間乘大1.5倍就差唔多。先由Wangs Talstation Pizolbahnen搭吊車上Furt站，再轉坐Chairlift 飛椅上Gaffia站，再轉飛椅上Pizolhütte站，就可以正式出發呢條Pizol五湖步道。


未上到Furt站已經係啲雲霧入面，心知不妙但已經無得打退堂鼓，屌頂硬上！


雖然大霧，但路徑指示牌都相當清晰，同埋都有一定數量嘅癡線佬一齊行，甚至有一家大細！上到呢個位，可以隱約望到起點嘅小水池，第一個湖Wangsersee唔順路，要係起點回到來回行一段路，相信今日乜都影唔到，放棄了


上一大段山路後，就可以到全日第一個高點（約2500米），Wildsee


好天係咁樣，真係差好撚遠

(Source：https://squarelilypad.com/2021/08/16/hiking-the-5-seen-wanderung-at-pizol-mountain-carts )

轉多幾個彎就到第三個湖，Schottensee


好天就係咁樣


又慢慢上山過埋第二個高點（約2500米），就見到第四個湖 Schwarzsee


個天仲清咗少少


但好天係咁樣


第五個湖，Baschalvasee，路過打完卡即刻走人


落山途中果然開始落大雨，條路變到極爛泥漿狀，再撈埋啲牛屎，真係非常精彩好天嘅話應該係Top Tier嘅山徑，甚至我覺得比馬特洪峰五湖更值得一行，更似高山健行又無咁出名無咁多遊客，可惜天氣呢啲真係可遇不可求...

預告：之後慢慢會好天喇，終於唔洗睇啲又落雨又大霧嘅相

lm
天氣好差

舊年10月去，係Zermatt 4日，有3日係睇唔到Matterhorn
10月好似都好高機率落雨
祝你好運

瑞士真係好睇天氣 預左三日兩夜 希望有一日好天啦

嗰陣interlaken同Zermatt各住3晚，點知住interlaken嘅時候就Zermatt好天，住Zermatt就interlaken好天
不過好彩買咗travel pass，有2日係即日來回咗Zermatt同interlaken

Stoos Ridge Hike （Klingenstock – Fronalpstock）
Stoos 係一個山中嘅小鎮，距離Lucerne唔算好遠，Hea遊大半日都唔算好趕，好多人嚟Stoos都係為咗行Ridge Hike 山脊步道，全長4KM，睇落好似好輕鬆咁

先嚟地圖


Stoos最出名嘅滾筒式纜車，聲稱係全世界最斜


Stoos其實唔係好大，如果唔係嚟行山，我都諗唔到仲有乜好做


坐飛椅上山，今日仍然都係陰天間中有陽光，唔落雨已經好好。唔少人都慳返一筆由Stoos行上山頂，我就無咁好體力喇


上到Klingenstock山頂，已經望到終點Fronalpstock，望落好近


望返Stoos 小鎮，或者叫村落更合適


一開始都係比較平緩落山路，左手邊已經見到琉森湖嘅一角


去到中段開始多上斜，有啲行八仙嶺嘅感覺


前面嗰個位野餐真係一流



尾段係大上大落，由圖中近山頂位下降到山坳小木屋，然後再急攀升到呢個影相位。由山坳落返Stoos可能仲快


幾經辛苦終於到終點了


呢度位處山脊最後高點，視野最為開揚，可以望到琉森、Mt Rigi、Mt Pilatus


整體嚟講，Stoos山脊線係比較唔艱辛嘅路線（但唔算輕鬆），幾適合想行吓山睇吓風景嘅人，但如果要追求大山大水高山峻嶺，其他地方應該更適合了。不過同Mt Rigi比較的話，我會更傾向嚟Stoos行山，無咁商業化亦無咁多人

好慘即日來回好遠 不過如果去到好天咩都值得
想問下嗰陣凍唔凍？

番到香港
之前去過3次瑞士，今次第一次同老婆去

買咗8日STP
1：落機 > Bern酒店 > 上Murren行個圈，因為STP包咗 > Bern酒店
Interlaken酒店太貴，所以住Bern
2：因為老婆未去過，循例都要上一上JFJ > Bern酒店
3：去咗Murren玩Paragliding，揀Murren而唔揀Interlaken因為峽谷玩個景會靚啲，加上STP可以上Murren，玩完遊Interlaken船河，繼續用盡STP，之後由Bern酒店轉到Lausanne酒店
4：Geneve + 法國Annecy，火車飛只係需要買Annemasse-Annecy，SBB App買只係6 CHF一個人 > Lausanne酒店
5：Zermatt + Gornergrat + Riffelsee，因為老婆未去過，都要去一去 > Brig酒店（因為Zermatt酒店貴到離譜）
6：行一行Lausanne+Cathedral，然後落Milan，伏伏伏，除咗Duomo外觀之外，其實無咩野睇，我覺得Lausanne Cathedral入面仲靚過Duomo
7：嗱嗱聲番上瑞士，去咗Stanserhorn，因為STP包 > Zurich酒店
8：St Gallen + Cathedral + Library，然後上Ebenalp+Seealpsee > Zurich酒店
9：ZRH走人

總結，Milan不值一去
Interlaken、Zermatt酒店貴到離譜，如果有STP，可善用STP住Bern、Brig或Visp之類

全程好天
第9日ZRH走人開始落雨

Annecy係即興去，食完午餐先由Geneve出發
但係Annecy感覺良好，個湖可以租架船仔踩
食野又平

全程好天
我係Day 3先開始慢慢好天，不過每晚都係要睇住天氣預報，再調整目的地，所以出現咗好唔順路嘅組合包括Chamonix->Grindelwald->First

張機票出發前一星期先買
有啲酒店出發前一兩日先訂
睇到大致天氣都ok，留咗一日半做buffer
瑞士話大唔大話細唔細，坐IC/IR其實1-2小時去到好多地方
例如Bern-Interlaken只係1小時，唔介意朝早由Bern坐1小時入Interlaken，然後黃昏玩完坐番1小時番Bern的話，酒店係平好多，直情係Bern車站上蓋，加上Bern Bhf夜晚大把野食夜收同埋有超市

所以除非你好多時間，打算留成日在酒店然後富貴到訂間有露台既房
打算在露台飲咖啡、啤酒、曬太陽chill的話，
根本唔值住Interlaken、Grindelwald、Lauterbrunnen、Zermatt

8月係瑞士旅遊旺季，大旅遊景點住宿真係唔平
我舊年10月定11月仲可以揾到合理價錢嘅Grindelwald住宿，12月尾想Book已經無哂，得返一間比較差的（可以望到Eiger），都要CHF 280左右一晚


我無住Zermatt，反而住係外邊個鎮Tasch，不過比我揀多次我會Book Zermatt 啲住宿，價錢我記得係平個Grindelwald的

當然前提係要早好多個月Book

因為真係好即興
所以好多都無得揀，同埋無冷氣

兩晚Bern Bhf旁三星酒店，雙人房兩晚2700+City Tax
兩晚Lausanne Bhf對面四星酒店，兩晚1700+City Tax，呢個真心抵住，仲要新裝修有冷氣
一晚Brig近車站類似Bnb既房，一房一廳一full kitchen，1000+City Tax
揀咗間有full kitchen，因為Visp Brig夜晚無野食甚至無野賣，至少有廚房可以煮面食
一晚Milan Centrale附近四星新裝修，450蚊+City Tax，意大利酒店真係好平
兩晚Zurich Hbf附近既垃圾酒店，兩晚1900包咗City Tax，真心垃圾，不過行兩個街口到Hbf，同埋咁遲訂無咩野揀。間野無冷氣，夜晚開窗訓，飛咗隻野入黎，初頭以為雀，之後發現係蝙蝠

Brig果間Bnb除咗有full kitchen仲要有洗衣乾衣機，
一晚一次過洗晒幾日儲落既衫+乾埋
我地今次只係帶咗夠用行程一半既衫褲去

睇完你d 預想圖，實景圖對比之後，
覺得你真係好曬時間
用你呢十幾廿日，用你呢十萬旅費，
留港每日短炒，分分鐘上到百萬

Mt Rigi
熱門遊客區，交通又方便，最主要兩條火車線，Vitznau - Rigi Kaltbad （吊車往返Weggis） - Rigi Kulm 同埋 Goldau - Rigi Kulm，前者最多遊客，因為好多都係坐觀光船到Weggis/Vitznau再轉車，我今次住係Goldau，行10分鐘就到火車站。

竟然仲有復古車箱坐，9點Goldau都未多遊客，位任揀


大約40分鐘就到Rigi Kulm山頂站，都仲算清靜


都仲係多雲，不過今日嘅目標就係無目標，四圍行吓輕鬆吓。本來計劃咗去Titlis，不過睇天氣預報好似得朝早好天，但係Rigi望落去Titlis方向好似又慢慢轉晴......


原來嚟度就係峨嵋山山頂仲係幾大風仲有啲清涼


天氣預報無呃我，真係慢慢轉晴！



山脊線中間有雪嗰度好似就係少女峰Jungfrau一帶，有錯請指


無啦啦做埋鐵膠見到火車上山就影相今日行程就係沿住火車軌旁邊嘅山路，轉落去某個觀景台，再搭火車上返山頂，轉另一間火車返Goldau


Rigi Staffel站，左邊就係落Goldau，全部都係比較舊嘅火車；右邊就係遊客最多嘅Vitznau方向，差唔多全部都係新車。由山頂行落嚟好輕鬆，全石屎路，半粒鐘多啲就得


沿住右邊車軌嘅方向繼續行，望住琉森湖一直落山，一段時間後就會到達一個觀景台，可能係全個Rigi最開揚嘅打卡點



Pilatus同埋Lucerne都係近在咫尺



返到Rigi Kaltbad站，上山火車要1粒鐘一班，落客前頂閘，上完客都係頂閘，所以呢段無人Check飛（亦無辦法Check飛，又無閘機）。啱啱走咗一班車無所事事，呢度冇乜嘢好做，唯有同馬生影吓相。


返到山頂嘆返支啤酒，都算幾平 CHF 6-7/支，輕輕鬆鬆咁就一日。Rigi其實有好多行山徑，好多都係10幾KM，鍾意行山計劃得好可以慳返唔少車費（除非你揸Swiss Travel Pass，Rigi 火車好似係免費任搭的）。

Rigi仍然唔係大家心目中嘅瑞士，雪山冰川綠草峻嶺，似係附近住宿後山咁樣，得閒上山行個圈野餐食吓酒Hea一日嗰種。係咪完全唔值得嚟？我會當Rigi當係休息日，尤其係前後都有啲辛苦行程，如果時間有限，Skip咗都唔算可惜

幾多個人去？男定女？

Rhonegletscher
如果係自駕、坐大巴的話，呢個冰川算係容易到達，因為唔洗再坐任何吊車／纜車上山。

Furkapass附近嘅地標 — 一間摺埋咗嘅酒店，呢度車位唔多，無位就要泊高少少路邊位。


呢度呢度有兩個選擇：第一，課金CHF 9，經下圖嘅Souvenirs Shop買飛行去冰川，好似仲有個冰洞；我就揀第二個選擇，窮撚行山繞過Souvenirs Shop 高處遠觀冰川。


其實呢度係瑞士官方行山徑嘅短短一段，先由停車場沿車路上行200米，左邊就有山路，20-30分鐘去到睇到冰川嘅地方，打完卡就回頭，路程短到都唔算係行山


望返間酒店


Rhonegletscher


如果有時間，應該可以下降到冰川位置（安全自理），我係高位睇就算。感覺呢條冰川唔算後退得好嚴重，紐西蘭南島西岸兩條冰川，聽聞10幾年前係可以由山腳徒步登上冰川，而家得返搭直升機一個選擇，因為後退得好勁好快。


BTW，Furkapass條19號公路都幾恐怖右邊嗰條Grimselpass 6號公路聽聞都係難揸

第一次入去第一時間都係飄零燕個畫面好靚