先聲明：小弟係男。就喺今日早少少，我同朋友背住成套攝影器材上西貢大坑墩風箏場等日出。去到半夜一兩點左右，山頂突然刮大風又落雨，好狼狽，都唯有收山。原本打算慢慢行，差唔多要行半個鐘先落到去搭巴士，點知途中有三部車對住我哋響喇叭。起初我哋無理會，後尾其中一部停低，司機落窗好熱心咁問：「要唔要順便送你哋落山？」
嗰一刻又驚又感動—夜深路黑，加埋要行成半個鐘，突然有人主動停車幫手，真係被暖到。佢哋最後好好人，將我哋安全送到彩虹站，完全不求任何回報。一路傾計先知佢哋係半夜出嚟玩同練車，仲準備去斯里蘭卡參加F4比賽。
成程車雖然短，但嗰份善意好實在。有人話城市愈大，人情愈淡，但我覺得—越偏僻嘅地方，越能感受到人情味。呢種好心、真誠、義氣，就係我想講嘅「真香港人」。
借呢個帖，祝願佢哋比賽順利，我都會將呢份善意傳開。多謝你哋，願大家一路平安。
附上今晚風箏場照片
再次多謝當晚幫我哋嘅好心人，祝你哋比賽順風，凱旋歸港。