我見有唔少人係新入坑 可能因為netflix可以玩到 同埋之前epic games免費送白金版
文明呢類戰略遊戲一向都係機制又多又複雜 完全無接觸過嘅新手
一入到game可能完全唔知自己做緊乜 所以我就想開一個簡單嘅教學post
呢隻game嘅介面資訊比較多 我將啲較為重要嘅野標記左出黎
當你唔知可以做啲咩嘅時候 其實你只要撳下右下角嘅行動掣 咁就不斷會有指示話你知有咩動作可以做
遊戲一開始你只係得一隻近戰單位同一隻開拓者
第一樣要做嘅野就係決定第一座城市嘅位置 橙色係開城嗰粒掣嘅位置
發展文明最重要嘅野就係有水飲 文明6就將水資源呢個概念反映係城市可以容納嘅人口
係淡水隔離嘅城市住屋上限係5 可以容納最多人口 河流, 湖泊, 綠洲都可以提供淡水
係海邊開拓嘅城市無淡水 但海水都好過無水 住屋上限係3
如果連海水都無 咁城市嘅住屋就只有2
如果你唔清楚邊格係有水可以打開左邊嘅開拓者濾鏡
深綠色係淡水 淺綠色係海水 白色係無水
雖然遊戲中後期會有其他方法俾你增加住屋 但係前期缺乏水資源會嚴重限制城市人口嘅發展速度 所以盡量要將新城市開拓係有淡水嘅地方
起左城之後就要決定要生產啲乜 一般黎開局都係會順序出呢幾樣野：
2/3隻偵察兵，1工人，1開拓者
撳呢兩個齒輪就可以打開嗰座城嘅生產介面 右邊嘅數字代表嗰樣野要幾多個回合先生產到
偵察兵係用黎探索地圖 地圖上有一啲部落村莊 只要用任何單位行上去嗰一格
就可以隨機得到有用嘅資源 當中包括科技 文化加成 錢 免費嘅工人等等
呢個係地圖搜索功能 可以幫你係地圖上揾你想要嘅野
而且探索有助揾到產能較佳 甚至係有自然奇觀嘅地方 咁就可以優先係嗰到開拓新城市
呢個係全game最肥嘅自然奇觀
而且打探到附近對手同野蠻人嘅位置同實力 就可以根據呢啲情報決定需要出幾多兵力防守
除左開局嘅時候生產順序大同小異 之後就可以按短期嘅需要黎決定要生產啲乜
如果你嘅軍事實力唔夠 就好容易俾AI同野蠻人打殘。但如果你過度著重軍事，忽略左發展，就會係科技上落後。所以簡單黎講就係要係安全同發展兩者之間取得平衡
產能
發展就即係提升產能 遊戲入邊嘅產能主要有六種 分別係用六種唔同顏色代表
科學(藍), 文化(紫), 信仰(白), 錢(金), 食物(綠), 生產力(橙)
科學同文化會分別用黎研發科技樹同文化樹
信仰同錢呢兩種都係遊戲貨幣 可以係特定情況用黎買野
食物係用黎增長人口 生產力係用作城市生產
前四種產能嘅用途並唔會區分城市, 而係成個國家咁累計
你可以係遊戲介面左邊最頂見到你成個文明呢四樣野嘅每回合產量
而食物同生產力係分開城市咁計 換句話說 即使A城市有好多食物同生產力 亦無辦法將佢直接分俾B城市 只能夠用係A城市到成長人口同生產
左邊地圖設定可以選擇你想係地圖上想顯示嘅野 如果遊戲一開始無顯示到地圖上嘅產能同資源 可以係到開返
城市
城市係文明6嘅基本行政單位 要用一個開拓者興建出黎
一座城市分別係由城市中心，區域以及城市邊界內嘅地格三樣野組成
你可以將城市中心同區域理解成市區，而其他地格就係郊區
城市啱啱開拓嘅時候只有城市中心一格同埋周邊嘅六格 城市嘅邊界會慢慢擴張
邊界擴張嘅速度視乎嗰座城市嘅文化 文化越高 城市邊界擴張得越快 你亦可以直接用錢買地
區域分好多唔同種類，例如商業中心，工業區，文化區 呢三個區域分別可以增加城市嘅收入，生產力，文化
上述呢類同某種產能有關嘅係叫做特殊區域，佢地嘅作用就係增加城市嘅嗰種產能
就好似現實中嘅中環商業區 觀塘工業區 西九文化區一樣
城市可以興建嘅特殊區域數量取決於人口 1人口嘅城市只可以興建一個特殊區域
之後每多3人口就可以多興建一個特殊區域
所以城市嘅人口越多 可以興建嘅特殊區域就越多 嗰座城市嘅功能就越齊全
區域係需要用到生產力係城市嘅地格上興建出黎 佢會佔用左嗰一格地
一旦決定左某個區域要係邊一格興建 之後就無辦法更改 所以起之前一定要諗清楚
至於區域應該要起係邊一格最有利 就要跟據返嗰種區域嘅相鄰加成
意思即係如果嗰個區域周圍有越多符合佢發揮功能嘅野係到 咁佢嘅產能就會越好
每種類型嘅特殊區域都有佢獨特嘅相鄰加成
例如聖地呢個宗教區域嘅其中一個相鄰加成係山 如果個聖地隔離有山就會有相鄰加成
每1格山就會+1信仰 咁周圍有5格山就會有+5信仰
你可以係城市嘅建造介面睇到不同區域有乜野相鄰加成
又或者去右上角嘅文明百科到直接搜尋相關區域嘅資料
文明百科幾乎有齊關於遊戲嘅所有資訊 佢亦都有網頁版
https://www.civilopedia.net/zh-HK/gathering-storm/concepts/intro
得閒再寫
利申玩開冇dlc default 難度
升完級再加7，突然同裝甲兵同級(45)，但係AI好似唔知咁會照打埋嚟