先講講我嘅背景，我係SEN，細個唔太識控制情緒，一直有輔導老師跟進同埋要定期覆診。
到咗小學四年級開始，因為唔太埋到堆，又成日外出例如學校旅行都有輔導老師跟著，有班同學開始唔中意我，傳我成日撩鼻屎（事實上係一直冇發生過），然後大家就開始我掂過嘅嘢特登唔掂，例如派薄特發跣落嚟畀我、唔小心Hi到其他同學或者佢嘅嘢即刻對我黑面等等。去到五-六年級，諗住轉咗另一班成績比較好嘅同學會好少少，但結果冇好到不特止，仲畀人越傳越多嘢，開始無啦啦行過同學隔離都畀人黑面，排隊特登讓我排先，好似想避開我咁，唔想我行埋佢身邊。事後我先知係有兩個（當時淨係知一個，另一個上到中學先知有份）喺學校識好多人嘅同學喺度傳我謠言，搞到同佢fd嘅人都唔中意我。
上到中學，其中一位我傳我謠言嘅同學去咗另一間中學，當時鬆咗口氣，因為有望擺脱排斥。但係，我太天真啦，當時另一位我未知佢有份嘅同學繼續傳我謠言，雖然小學嗰陣特登唔敢掂到我嘢嘅情況冇再出現，但情況比之前更加衰，黑面嗰啲繼續有，莫名奇妙無啦啦畀人鬧，我做咩都好似唔啱某個人心意咁、細細聲講我唔想畀我聽到（我對於有人講我名好敏感），又有班人（包括傳謠言條友）成日用奇怪語氣嚟撩我玩，當年覺得有景轟，所以唔理佢哋，但畀人針對嘅日子耐咗，開始心郁郁想「加入」班同學。
中一嗰陣，因為入咗差班，同學都比較多曳嘅。有兩個留級生同佢幾個fd（全部做開運動，所以大大隻）成日行過撞鳩我，行過我張凳就推我張凳整到我跣咗落地，音樂堂喺音樂室上坐我後面就踢我張凳，最後忍受唔到就同老師講咗，畀咗訓導處理之後班人的確收斂咗，但就繼續畀人針對同細細聲講。
到咗中二，入返普通班，諗住班同學好少少，唔再畀人欺凌，但結果係繼續成日畀人針對（當時仲未知有人傳謠言），只不過係換咗班人做。當時因為畀人針對到成日冇乜信心，所以開始理嗰班用奇怪語氣撩我玩嘅同學。
理咗嗰班人之後，的確多咗人同我玩，當時仲諗住玩耐咗可能變真fd，甚至覺得佢哋係好人，針對我嘅係仆街（而家諗返真係好傻，最初明知奇怪仲踩隻腳落去），但當日子耐咗，就發現係另一回事。
班人開始慫恿我做奇怪嘅事，例如叫我做奇怪動作、用尖聲語氣叫我英文名、要我同佢玩小學雞遊戲引其他人睇我等等，有次最過份嘅係想慫恿我去非禮個身材靚嘅miss
，唔做就言語上壓迫我。同一時間，班仆街開始想打擊我自信，例如我畀老師讚之後就用嘲諷語氣同我講「勁喎」，又同佢啲fd講話「嗱，XXX都得啦」或者細細聲講我，針對我嘅就用奇怪眼神望我同埋都係細細聲講我，所以中學嗰陣成日好驚畀人讚，做嘢特登做差啲，防止自己畀人讚，久而久之變得冇信心。
有趣嘅係，當年班仆街已經成用玩嘅語氣笑我傻仔，但因為佢哋自己玩都有時會咁互笑對方，所以冇為意。直到中四上學期，佢哋嘅行為越嚟越過伤，喺上堂嗰陣慫恿我做奇怪動作之後攞手機影我或者叫針對我條友睇我做令佢更加憎我，同埋玩玩下無啦啦打我，令我開始懷疑呢班人係咪真係想同我fd。喺放新年假之前，聽到班仆街細細聲講我「條傻仔...」、「佢個頭髮成個低能仔咁...」等等（我睄到佢哋講嗰陣指住我），我綜合返之前發生嘅所發生嘅事，覺得佢哋根本一直當我弱智，冇當過我係正常人。同時發現另一條多fd又一直同我嗰條仆街就一識到新fd就同人細細聲講我，仲話邊個同我玩就同我一樣都係弱智，慢慢傳下傳下就個個都覺得我唔正常，見到我就行開，驚畀人排斥埋一份。當時決定放完新年假之後返學就唔再理班仆街，放完新年之後撞上疫情停課，啱啱好有大半年唔駛再對住班仆街可以唞下。到咗復課之後佢哋撩我我冇再理佢哋，佢哋嘅真面目就開始出現！
佢哋見我開始唔理佢哋，唔知係咪知我知道咗真相，所以成日上堂嗰陣特登整我（老師編到我同佢哋坐好近），或者攞我啲嘢走特登引我追佢（而家諗應該唔追佢睇下佢點），目的就係想我繼續理佢哋等佢哋可以繼續玩我，當時日日都畀佢哋搞到唔想返學，雖然直到畢業都因為疫情而只係返日學，但因為日日畀人騷擾而覺得每一日都好漫長。
到咗中六，因為一方面要準備DSE，又要每日面對班仆街嘅騷擾，壓力去到頂點，開始有自殺嘅念頭。好在上天閂咗道門，都會開返扇窗，2月考咗兩日Mock exam之後學校宣佈中六都停埋課提早study leave，可以喺唔畀人騷擾嘅情況下溫書。
畢業之後，升讀FD，雖然冇再同班仆街一齊，但因為之前嗰8年嘅陰影，所以好驚同其他同學相處，自殺念到越嚟越大，試過有次同屋企人有小拗撬之後放學唔返屋企，上咗棟唐樓嘅天台想自殺了結一切，但又因為怕死而退縮，成個FD喺陰影下度過。直到上咗HD，第一日返學分組嗰陣有個同學主動同我一組，喺學校識到第一個fd，先開始擺脫陰影（我到而家都好感謝佢）
綜合返呢8年所發生嘅事，有時成日諗點解人生最美好嘅中學時光，竟然成為我人生最黑暗嘅時刻，身邊個個同學都識fd吹水拍拖，而我就日日畀人當弱智仔咁玩，身邊一個fd都冇，就算冇份騷擾我同針對我嘅都當睇唔到，而且都特登避開我。
咁我有冇試過反抗？有！有次佢哋玩得太過份，我已經表達咗我唔中意好嬲，佢哋更加變本加厲整我，我打柒佢哋，成班仲話咩傻仔打人、有病之類，跟著畀老師知道咗要見家長，件教畜講嗰句我一世都記得：「佢哋講你我罰唔到佢哋，但你郁手打佢哋你就要記缺點，你郁手就你錯晒」，我屋企人講嘅都係差唔多（先唔好鬧我屋企人，除咗覺得郁手打人一定係錯之外其他嘢都對我好好），對於始作俑者完全冇懲罰，只係講句叫佢哋講說話唔好咁過份就算。
學校又有冇同我一樣嘅被欺凌者？有！但佢哋唔單止唔會幫你，仲話你廢，話自己由小一開始畀人欺凌，一直緞練自己緞練到唔影響情緒，甚至加入埋班仆街一齊笑我等自己唔好畀人蝦得咁慘
。而家諗返起，好遺憾當年唔知道中三之後可以去讀VTC，如果當年知道嘅話，我絕對唔會選擇繼續讀中學，一定去讀VTC，但事情已經過去，只能接受現實。有時都好想返去細個嘅時候重新開始，冇SEN問題就唔駛有輔導老師跟進，就冇欺凌事件發生，可以擁有完美嘅中學生活
。
