［認真post］發現老公叫雞

如題，請各路巴絲俾意見。

背景：拍左拖好幾年，結婚無耐，未有小朋友，兩個都未三十同有穩定收入。

借故返屋企住左幾日，未同老公攤牌，所以一切如常。依幾日諗左好多野，宜家主要想知 - （一）點解要叫同（二）離唔離婚。

（一）利申唔係男仔頭性格，係千依百順type所以可以排除喺性工作者度搵返啲女人味既依個原因。性生活方面，本人床上絕非死魚，雖然一定無女優咁勁但起碼唔會冇癮（要做的都有）（定宜家性工作者係扮演S嘅角色）。身材同樣都符合大眾審美觀（唔好攞雲姨同我比）。所以真心想知，除左上述原因，仲有乜原因促使男人叫雞（請參考埋背景）。我覺得呢樣野都值得討論，警世又好，之後避免又好。

（二）我同老公都好少鬧交，自問性格都好，老公平時對我都好。成件事未東窗事發前，我覺得自己嫁啱人，老公俾我感覺都係專一type。據了解，老公都唔係雞蟲，（希望）只係叫左一次。但成日聽一次不忠，百次不用，所以又想知巴絲點睇。係咪一個男人平時幾好，一叫雞就已經唔得？

已睇媽媽谷d post，但始終佢地有後代同結婚年期都長，冇乜參考價值。所以先轉戰連登，期望各大巴絲理性討論，謝