熱朱係度祝大家入到心儀科目呀，聽到大家嘅好消息。
傳說拜下JUPAS God 大D機會入A1
歡迎放底你既Jupas Offer ，祝各位巴絲順順利利直入A1 ！
祝大家入到心儀科目呀
-----------------------------------------------------------------------------------------------------------------
（年經
）有人歡喜背後，總有人未必如預期咁理想……
雖然多左院校有彈性收生，但唔係人人受惠得到 。多左自資院校有學士學位，但未必個個岩心水 。
面對DSE失利，未必入到心儀科目，有人會考慮ASSO/HD..跛左腳要唔要補返科呢？
有人會考慮Retake，到底...Retake定副學士好呢，定係雙修呢？
歡迎係度傾下，參考下意見，再作決定
決定自修嘅話，真係要諗清楚到底要報邊d科 ，做好時間管理，搵條最啱自己嘅路 。
(例如過去有D同學一開始雄心壯志想retake哂咁多科，去到臨考覺醒唔夠時間要選擇性咁溫；或者係all in 係 一兩科 , 點知今年改左出題方法，考完一科先驚
）======================================================
CD-ROM 升學諮詢 (包括Quit U / Asso / Retake) / 加入2026 DSE 自修同學會:
https://forms.gle/j8yKzefSfhTTbeiRA
承上，如果考慮Retake，建議評估下自己狀態先！
想自修既話，請睇晒下面先，再問下自己係唔係承受到。
未來一年既自修生活
以上唔係嚇你，當然適當既朋友社交都好重要，話哂自修係成年既事，保持心理健康相當重要。事實上，自修生活需要好有規律，唔好見到人地自修升得勁多分就覺得Retake「其實唔難」。
要知道...Retake係一種方法，但唔係每個人都適合，要升一分都已經唔簡單 ，背後一定付出左好多好多心機。作為自修生，呢一年入面要修心養性，心裡面要清楚自己做緊乜野同埋需要完成D乜野，跟住自己訂下既目標奮鬥，要不停重覆讀書操卷改卷，好似無感情既機械人咁。淨係要戒手機呢一點 ，已經超級難，有時候溫溫下書，又忍唔住碌下部手機，上下連登IG睇youtube ，仲有Threads添 ，身邊無限咁多誘惑。毅力同決心，缺一不可。
試諗下自修個一年，大家身邊既八卦朋友、屋企人間唔中會 「關心」
你自修進度，當中既心理壓力，難以想像。而自己每日對住同一大堆Notes和Past Paper，要Keep住自己有動力去讀書，唔係咁易架師傅
。有時壓力大起上黎連訓教都會發個操卷或者係放榜衰咗既夢 ，或者會質疑自己自修既決定。然後你又要開始第二日既溫習，感覺溫左書實質上又好似無把握咁，擔心浪費左一年，無限輪迴，自問考慮Retake既自己頂唔頂得順呢？ 
重覆去溫書在於考試黎講都只係基本野，選擇自修呢條路，仲有好多無形中既壓力……請各位睇埋下邊幾個點，決定自修前，諗清諗楚 ：
1. 自修，冇人會督促自己
自修麻煩位係好多DSE相關既事都親力親為去處理 ，比起讀中六額外多左唔少野。由報考DSE同JUPAS，去到搵筆記, 做Mock Paper, 做Past Paper，都要自己去攪掂，唔會有人代你去做，而自己放底左讀書近半年，好多野又要重新Pick-up返 。而且，唔會好似以前返學咁，有測驗考試功課去督促自己溫書 ，Keep住進度，Sorry，係完全冇既 ；有野唔明唔會隨時有老師同學答自己，有補習既話可以問補習導師，冇既話就要上網問人，但你會發現唔同人有唔同答案，最後又係要自己搵翻邊個先係真正答案。可以問一問自己，你有無呢個決心毅力 持之以恆實踐呢......
2. 覺得自己係零
冇左學校既測驗考試功課，係好難知道自己有冇進步，百分之一千既自修生去到10-11月既時候就會開始懷疑自己溫書究竟有冇用，溫完都唔知自己溫左啲乜，做完Past Paper又冇明顯進步 ，越溫越迷茫，唔敢肯定自己所花既時間係咪值得。始終自己一個人容易亂諗野
，可能你會有一朝訓醒，覺得自己無所事事，不事生產，坐食山崩，做左屋企既負擔。久而久之，你會當左自己係一個躺平師 ，連自己都開始討厭自己，夜晚越諗越多開始失眠。
btw，其實自修都係讀緊書，辛苦在於不斷要同自己既意志+身邊人嘅期望同眼光鬥爭，說服自己做緊既野係有意義既。想自修的話，擋唔擋得住呢啲負面感覺？
3. 煉成摺毒性格
當8月尾9月嚟到，你可能會見到啲中同都開始咗佢哋嘅大專或者Ulife，參加ocamp，識到新朋友，享受hall life，你同佢哋身處係平行時空咁。你可能會覺得自己同佢哋無話題傾，好似住喺兩個不同世界咁。大家嘅興趣同話題都變咗，心臟夠強大的話都仲好，自信既話就會自己摺埋
，有聚會都唔去。即使你決定去聚會，你可能會發現大家都好關心你嘅學習進度，但有時佢哋嘅「關心」 會引發自卑感作怪，會覺得好唔自在。有啲人可能會問候你溫成點，或者講野有骨
。大時大節啲朋友約出街，你要取捨留喺屋企溫書定去玩，但當你真係出去玩嘅時候，返屋企後可能會有罪惡感 ，唔應該出去玩。而假如你留係屋企 ， 又會成日囉囉亂心理唔平衡無得約Friend 
=======================================
講左咁多，唔係嚇大家，而係講定比大家聽自修有好多心理關口要過。
自修係一個重大決定，所以想大家知清楚自修既生活係點樣先。 始終時間都係成本
fatc如果你覺得自己捱到既，歡迎大家加入自修同學會2026 ，稍後時間會同大家開一個屬於自修生既WhatsApp Group，今年同樣同過去幾年一樣都會提供各式各樣支援比自修生。 (Group主要比大家交流資訊 ，個別都會有人同大家傾下自己嘅野 #
#fatc )除此之外，吊頸都要透下氣既，我地都會想有定期聚會，等各位自修生可以互相鞭下 ，自修路上，你不是孤單一人，當然最終搞唔搞得成要視乎唔同Retaker的意向 ，同埋始終大家水平目標好多時候唔一樣
各位有關retake既野可以隨便問。CD ROM或者有興趣加入同學會既巴絲打，可以係下面條Link留言或者留低TG聯絡方法。( 保障自己，連登上就唔好講個人資料了)
CD-ROM 升學諮詢 (包括Quit U / Asso / Retake) / 加入2026 DSE 自修同學會: https://forms.gle/j8yKzefSfhTTbeiRA
