八仙嶺山火︱
張潤衡現身回答網民疑問
堅稱：坐咗喺度玩game boy ，聽到老師叫我走，我就即刻走。我點知真相？
證人指穿藍白衣的人食煙
「我當日係有着過件藍白色嘅波衫，但同時間我都有另一件長袖嘅黑白色衫。」
拒睇《真相猜‧情‧尋》
「呢個節目本身就係出於極唔尊重嘅情況發生。
夾硬話我應承咗佢」
被指已收政府巨額賠償
網民勸賺夠好心收手
「我從來冇cap水」
無綫新聞及資訊部節目《 #真相猜情尋 》，其中兩集主題是96年 #八仙嶺山火 ：馮堯敬紀念中學五名師生遇難。死因庭相信八仙嶺山火必屬人為，有至少四名學生吸煙，但無法確定山火由誰引致，亦無法確定肇因是遺下煙頭或玩火引致，最終裁定五人死於意外。
節目找來當年馮堯敬學生 #李雋文、其中一位死者的母親、時任大埔警區分區指揮官靳敦賢（David Michael Gunton, SP）、山火跨部門調查小組主席郭晶強受訪，重組真相拼圖，然而關鍵人物張潤衡婉拒受訪。主持兼監製方東昇在節目中說：「對成個社會嚟講，真相嘅意義除咗出一口氣，求個明白，討個公道，仲有乜嘢呢？如果我哋搵到答案，但冇汲取教訓，歷史遲早重演，悲劇只會再臨。到時或者真係應驗一句：『真相，畀你搵到，又點呢？』」
「真相，畀你搵到，又點呢？」語出自 #張潤衡 15年接受《壹錘定音》訪問，回應被指吸煙引致山火的指控：「喺山上食煙嘅一定唔係我，因為我真係冇攞過出嚟。我冇吸煙嘅習慣，嗰次係我第二次攞住支煙。」
再成焦點，網民不斷在張潤衡的社交平台留言，希望了解真相。直到今日，他終於「上水」，回答網民疑問。對於有網民指：「對你嚟講係要move on 。但呢件事嘅家屬又好，大眾都好，其實希望知道件事嘅真相，可以learn from the mistake。」該網民更希望他看看《真相猜‧情‧尋》，感受遺屬心路歷程。
【自言被斷章取義】
張潤衡強調：「其實嗰句說話我係畀網絡cap圖出嚟斷章取義。」又謂：「嗰陣時問我想唔想知道真相，我嗰一刻個腦都好混亂。你想我點答？」他更指：「首先，係你哋認定係我做，但係我亦都確實話畀你聽嗰個唔係我。山火發生嗰陣，其實我係坐咗喺度玩game boy ，聽到老師叫我走，我就即刻走。我點樣知真相？我都唔知真相，我點樣回答？」
他表示不會看該節目：「呢個節目本身就係出於極唔尊重嘅情況發生。有好多鏡頭以外嘅嘢你哋唔知，正如我從來都冇應承過佢哋接受訪問，佢就夾硬喺個節目度話我應承咗佢。事實係嗰個李嘉嘉一開始打電話俾我，我已經拒絕咗。佢要約我傾幾句，得，我就約咗佢諗住傾幾句。點知佢帶晒成隊人過嚟，完全事前冇通知過我。呢啲嘢你哋又知咩？」
【稱沒見過人食煙】
被問到有否在小平原見到有人食煙，他斬釘截鐵說：「沒有，我在山上沒有見過人食煙。」對於網民表示：「但當時有新聞片訪問學生話，見到有人食烟，有目擊者。」他回應：「希望你搞清個邏輯嘅問題，而家個問題係問我有冇見到，咁我嘅回答係我冇見到。」又說：「我都明，但過去十年，我一直好少出聲，換來就係大家不斷係網上遮住自己個樣來盲目攻擊本人。因此，我會在時間許可的情況下，回覆一些比較理性的提問，如一些盲目的滋擾，我已經委託公司的同事幫我封鎖。」
對於當年有證人作供，表示見到身穿藍白色衫的人食煙，而專家證人亦指山上自燃的機會極細，網民質疑：「個生火工具又一直喺你度，你其實唔認，真係有用咩？」張潤衡反駁：「請搞清楚你嘅量詞，乜嘢叫個個證人？同埋，點解我要去承認一樣自己冇做過嘅嘢呢？至於我點解一路做好多嘅工作去回饋個社會，係因為我父母一直教我，喺我受咗傷嘅時候，得到個社會好大好大嘅支持，所以我必須要回饋社會。」
【指消防處只是推測而非證實】
有人留言：「當年主力調查的消防處長郭sir（消防處前處長、八仙嶺山火跨部門調查小組主席郭晶強），已證實係人為 非意外。」張潤衡說：「首先，搞清楚你嘅用字，佢唔係『證實』，佢係『推測』。第二，呢件事係法庭的『判決』係『意外』。第三，就算係『人為』，我推測你的意思是指向我，而我的回應是『那不是我』。」
有證人指穿藍白衣的人食煙，到底是張潤衡嗎？他表示：「我當日係有着過件藍白色嘅波衫，但係同時間我都有另一件長袖嘅黑白色衫。我依稀記得有印象，就係上小平原之前嗰段路，因為我哋要爆林，嗰度係喺密林入面嘅，啲樹枝都好鎅手，所以喺嗰個位置我係有着返嗰件長袖嘅黑白色衫。至於之後我幾時除返嗰件黑白色衫，我就真係冇印象了。佢哋所指嘅藍白衫嗰個人係唔係我？咁呢條問題其實我答你唔到個喎，喺嗰個時候，我哋又唔係一人拎住一個手提電話，跟住佢叫我揮手，我就揮手確認嗰個係我。」
【當年剖白：我都冇辦法改變過去】
他自言：「『真相知道又點？』，成句原文係，我知道真相咁又可以點？ 唔通我可以改變過去發生嘅事情之類，你哋咁得閒、咁有時間就自己上網去搵返嗰條片啦。然後你cap咗我呢一句出嚟，就話我去表達：『就算你知道真相都奈我唔何』，而我想表達嘅係：『就算而家搵到真相，我都唔可以改變已經經歷咗嘅痛苦，倒不如將眼光放返喺前面嘅路』（補充一點，嗰陣時我小朋友啱啱出咗世，我一路學識咗技能，啱啱可以喺唔同工作上面做緊貢獻，所以我嘅目光真係睇緊未來）。」
翻查影片，當時主持問他，會否想知道真相，他當時剖白：「真相，你搵到又點？我都冇辦法改變過去，我只能夠喺未來盡力努力生活。」
有人留言：「其實政府都賠咗好多錢畀你，賺夠好心收下手。」他回覆：「我唔明你究竟講呢句說話係乜嘢邏輯，我從來冇cap水，我都係平常一個打工嘅社工，最多係我有一間公司，而我公司集中做嘅服務，都係向學校或者唔同機構提供教育服務嘅正常公司，我公司都有好多專業導師係提供緊教育服務。我想問收乜嘢手呢？唔好講到好似我係犯罪集團嘅老闆咁啦！同埋，我唔知你有冇聽過我嘅講座，我從來都冇借呢件事去cap水。」
#娛壹
當人白痴
? 佢咁講 我第一次聽
（總好過話：唔排除當時可能有其他着藍白衫嘅人士在場。）