點解我付出左咁多，你都要離開我

接近一年冇再聯絡，七夕又到喇，我終於鼓起勇氣接受呢件事，雖然你未必會睇，但我都決定寫呢封信。回想我地由相識到拍拖，唔經唔覺差唔多五年。我一直都想將最好嘅一切畀你，由陪伴、健康，到你嘅家人同朋友，我都盡力做到最好。可能你係一個焦慮嘅人，我選擇包容，承受你嘅指責。每年一次分手，我總係低聲下氣求你，甚至迷失咗自我。我好怕你唔開心，怕你受傷，選擇逃避，寧願自己辛苦同痛苦。喺你難過既時候，我用我嘅方式幫你，盡我所能，但漸漸地，我越嚟越唔知自己想要啲咩。每件事都以你為先，甚至要食偉哥都係為咗你，我已經唔知自己做緊啲乜。
呢幾年有你陪伴，我真嘅好開心。我唔係為左性需要先同你一齊，雖然我都好想要，但唔識點樣同你開口要求，只能夠用我嘅方式愛你。你係我第一個女朋友，我好尊重你。雖然我想同你走到最後，但無法兌現承諾，對唔住。
你嘅家人同朋友，我都好努力去關心、保護同幫忙。我優先考慮你嘅家庭，忽略咗自己嘅原生家庭同自己。我嘅家人亦好珍惜同你嘅相處，你嘅要求佢哋都盡力配合，你開句聲，大家都為你安排。
我都有壓力、焦慮同恐懼，我都想被關心同被愛，呢個係事實。不過到最後你再次選擇離開，仲提出一啲明顯失實嘅指控黎話我唔關心你，我真係好唔開心。究竟我做錯過啲咩嘢事？我係咪太敏感？我係咪唔識關心你？到咗上個月，我對任何人嘅信任都用盡，一班由細識到大既死黨叫我放低，我唔肯，甚至同佢哋絕交，我都要維護呢一段感情。焦慮嘅傷口可能要一世去修補，我需要一個會珍惜我、愛我嘅人，我真嘅好攰，唔想再怕東怕西。
我希望你會了解自己多啲。如果你再拍拖，唔好再拖延，唔好用工作忙做藉口，話人無時間陪你。你都要考慮人地同樣有工作、有自己嘅私人時間。好似我咁，放工等你放學，假期等你做完嘢，我從唔出聲、唔回應。你需要顧及別人嘅感受。

多謝你畀我幸福肥。我其實唔太鍾意食飯，但你每次都叫到成枱都係，我唔想你浪費食物，所以幫你食晒。我食得多熱氣嘅嘢，只因為唔夠飽，我只想你食得開心，食得健康。每次去你嗰度，見你又要做嘢、又要煮飯、又要洗碗，幾個鐘都做唔完。我唯有買外賣畀你同你家人食，希望你有時間做嘢，早啲休息。
你每晚都打畀我，總係你講哂冇我講，其實我有好多心事想同你分享。我畀完反應，想講自己嘅事，你就會話：「寶寶，你係咪一定要而家講？我聽日要早返工。」其實我第二朝都要八點返到公司做嘢時，我都好努力做自己。後來轉咗另一份工，因為你想移民，我承受咗好多壓力，工作又做得唔開心，病多咗，但喺你面前我仲要扮冇事。你讀書時陪我少咗，我更唔想打擾你。
我選擇咗你，放棄哂自己嘅朋友同生活。好多嘢我想做，但朝早返工晚上進修，我真嘅好攰，只想瞓個好覺。睇戲嘅時候我都想好認真咁睇，但太攰。多年來因為呢啲原因，我好少搵你一齊睇。
我想講嘅野，一個月都講唔完。你係一個迴避型嘅人，我配合咗你好耐。你成日問我你鍾意啲咩花、睇啲咩，我都想問返你，我鍾意啲咩？鍾意睇啲咩書？我無法再問你曾經愛我有幾深，我而家仲好愛你，但我只能將呢份愛藏喺心底。我唔知點樣再走近你，因為我唔知點樣信任你。我甚至要請你閨密幫我解釋，叫佢打畀你，但你都無信任我。可能呢個係你愛嘅方式，可能你覺得我哋曾經開心過，但對我嚟講，我未完全感受到你嘅愛。多謝你陪我去旅行，我見到你最可愛嘅一面。快閃熊野古道、拖住大喼賞櫻行山呢啲往事，同你一齊前行，我好開心，好想陪你走到終點。我其實好怕你會主動離開我，所以悲觀，感到壓力。但而家呢啲都唔重要，我會將佢哋收喺心底，似相片咁封存。相信你都唔想再見我，唔知故事嘅人不如當無視。
我愛你，確實感受到你嘅心，但而家我只想將呢啲收起，因為太痛喇。如果你有一日會回心轉意，我會等你，但同時希望你會遇到一個比我更關心你、無條件為你做更多嘅人。
最後，抱歉打擾咗你而家嘅男朋友，佢冇報警我已經覺得好幸運，我唔應該做多餘嘅事。我冇恨你阿妹，冇恨你閨密，更加冇恨叫我醒吓既朋友，最多只會問自己點解為你做咗咁多。
而家我對你只有普通嘅關心，祝你平安，身心健康。以我對你既了解，你應該搵心理醫生睇睇，你嘅壓力令你失控。如果再同人拍拖，請多留意點樣同人相處。
阿明
2025年8月2日 仲夏

好撚kam…

自言自語

人哋都唔愛你
自我感動

打咁大篇嘢，就係想講自己好偉大，分手完全係對方嘅問題

一邊話自己好愛對方，一邊繼續自我中心

好心你慳啲啦，成日以為自己做我好好，你根本唔知自己有咩問題，你係咁好嘅就唔會被人飛啦

戀愛通病
1.有"付出一定會有收穫"觀念
2.人生剩係圍住對方轉
3.強加自己認為係愛嘅付出畀對方而無視對方需求
4.將自己擺到最低
每次啲月經感情post都係衰呢幾樣

最近啲朋友們見我咁 我都唔想講太多 我無咩興趣兒戲感情 佢地唔知我上年幾痛 鐘意笑就笑鳩我 我係過去喊左太多晚啦 件事我好攰啦 我唔想再喊

其實內情係點得你啲最好嘅朋友先會有耐性聽同分析，我頭先見到咁多字我都唔想理

我想問個男嘅係咪又肥又毒？成件事係個男嘅錯囉

多謝你畀我幸福肥。

我其實唔太鍾意食飯，但你每次都叫到成枱都係，我唔想你浪費食物，所以幫你食晒。


我食得多熱氣嘅嘢，只因為唔夠飽，我只想你食得開心，食得健康。
（你食熱氣野肥機會大啲 又幫人食哂 又唔夠飽） 有啲......


每次去你嗰度，見你又要做嘢、又要煮飯、又要洗碗，幾個鐘都做唔完。我唯有買外賣畀你同你家人食，希望你有時間做嘢，早啲休息。

（條女煮咁耐 算好女啦 ）
結論 自我感動居多 你覺得你付出左好多
你好唔鐘意 其實唔洗做 人地唔洗受
你唔夠飽咪食正常野 唔洗賴咩
叫外賣 人地都會識 唔好覺得好加分
肥無得賴天賴地 感覺都幾。。。

條女唔愛你
你付出再多都係多餘

短跑先講求俾力，長跑講求省力
真係夾嘅就唔駛點付出都會夾
搵對合適嘅跑鞋（伴侶）比打篇千字文來得重要

唔駛諗咁多

條女唔會突然間喺連登睇到呢篇嘢跟住回心轉意

死咗條心

太長..

唉 呢一年內我keep住玩apps想識啲女仔
但最後都冇一個可以開花結果。。。

點解你覺得自己付出好多，
人地就要受

threads？

唔一樣播，已經係女朋友，一齊左，係女人唔知足播