有公務員同Emily講，換水事件成為圈內熱話，以前大家飲COOL或可口可樂嘅Bonaqua，近日有人見到辦公室水機有唔認識嘅牌子，隨即上網搜尋品牌資料同埋查核內地衛生檢測嘅報道，但亦有公務員少理，話坊間唔少飲品、食品都係內地供應，無乜所謂。有公務員朋友只感好奇，點解身處香港而唔買最近嘅本地供水。
圖1之1 - 政府最近採購更實惠嘅水供辦公室員工飲用，港島區由「鑫樂」品牌中標，水樽上標貼嘅品牌則係「觀音山」，樽口位有「合格證」、 「大灣區老品牌」字樣。
港島新界轉咗 九龍續飲屈臣氏
物流署今年6月批出3年期嘅新合約，睇番物流署公告，政府分3組合約招標，分別由屈臣氏、時貿國際同鑫鼎鑫商貿投得。物流署回覆，港島區中標品牌係「鑫樂」，據Emily所知，水樽上招紙就寫住「觀音山」。
物流署話，上一份兩年期合約總金額1.43億元，即平均每年7146萬元；剛生效嘅3年期合約總金額1.66億元，即每年平均5535萬元。
物流署強調，飲用水必須符合指定技術規格，包括品質符合《公眾衛生及市政條例》同食安中心《食物微生物含量指引》中有關飲用水嘅微生物標準，今次同上次招標規格相同，又話「為確保飲用水品質，政府會定期檢測中標者提供的樽裝飲用水」。
