一落地，要住酒店，開支一直有，收入就無，而且短租會好貴。
搵屋長租又係好煩，同埋無工作，好難租到屋，係搵屋既過程，會有壓力。
我甚至聽過有人搵極到搵唔到，要上香港人fb群求助。
如果有小朋友，更困難。
間屋有小朋友、寵物，一定對間屋有損耗，業主未必肯租的。同埋對方唔交租，有小朋友都好難趕。結果就係一開始業主會好謹慎- 點解要冒依個風險。
租到屋，搵工又係唔容易。從底做起，稅高，人工低，未必個個面對到現實。又係有壓力。
而搵工既過程，可能搵極都搵唔到文職，又會係一個困難。（當然做倉可能易少少）
如果有睇開心理醫生，英國嚟講啦，一落地係難即時睇到醫生。未租到屋，正常難搞少少gp。airbnb或者可以，我未試過。要儘快搞，要約gp快極都要一個星期。如果食開處方藥，見到醫生之前，係買唔到的 。
就算見到gp，你要用非母語去睇心理問題，又係一個困難。係香港，同廣東話傾，會好好多。英國正常係gp會轉介你去醫院再做心理治療，又要等，等安排翻譯，都幾難搞。唔係話唔得，我覺得係香港治療溝通上應該會更暢順，因為始終用緊母語。
移咗民，所有野都要靠自己，朋友無，而英國又少娛樂。要調整心理，又係一個壓力。依邊個個人都想搵錢，尤其d移英港人，個個想r生意，人人都睇錢。係外國要遠離華人，包括香港人。即係無人會幫你，所有野要靠自己搞，搵資料，同人溝通，唔會好輕鬆。
最後，英國有時陰天多。尤其冬天，3點天黑，又凍，屈起屋企，除非你家庭十分和諧，否則有拗撬，又係一個壓力。依個要所有家庭成員都情緒穩定先得，或者地方大到可以有位抖下氣。
我聽過有朋友移民，形容自己「多次崩潰既邊緣」。當然我無詳細問啦，各人家庭都有自己既性格、問題。如果遇到另一半成日好多野講，諸多意見，成日埋怨，真係好難搞。無抑鬱都變有。尤其係冬天。
當然，有錢好緊要，有幾百萬cash，絕對可以解決好多問題。如果連一百萬都無，就會有少少阻力喇。
但當你見到d錢愈嚟愈少，點都會有d心理壓力。尤其工又未有，又有各種開支。
無論點，移民係一件大事，仲係個好大挑戰，唔係簡單既事。如果各位想移民，真係要有準備好，因為會面對好多問題，亦要自己一手一腳去解決。無咩人真係幫到你。第一步、第一年係最困難，立足到，慢慢穩定到生活，生活會好過香港ga。問題係捱唔捱到。
點都好，祝大家身體健康。
有病就咪撚移民啦
