金庸教我點樣去『得到』，而古龍教我點樣承受『失去』
以前細個睇金庸會有好多幻想，好多正能量，睇住個主角成長點樣一步步得到好多嘢（武功、朋友、權力、女人），最後就會教你做人擁有所有嘢可以瀟灑脫俗，睇所有事都可以雲淡風輕。睇完會好有滿足感。
而人大咗之後，先會發現到古龍講緊乜，然後發覺自己金庸嘅世界已經唔啱我。
因為現實人生中我開始失去。失去健康、失去朋友、失去夢想，甚至失去愛人。發現努力唔一定有回報，善良可能會被利用，而好多遺憾都係窮盡一生都無法彌補。
李尋歡教你唔係move on，而係點樣同呢個巨大嘅空洞、呢份永恆嘅悔恨一齊生活。
楚留香教你要接受人性嘅脆弱同黑暗、朋友嘅背叛，比敵人嘅刀更傷人。點樣保護自己，唔係變得冷酷無情，而係要依然保持清醒同孤獨。
簫十一郎教你當你失去晒所有名譽、地位、安穩嘅生活，你反而得到一個最珍貴嘅機會：去搵返真正嘅自己。因為唔再為咗滿足其他人嘅期望而活，你先至真正自由。
傳紅雪教你人生就係一場冇得贏嘅牌局。
睇完啲古龍大作，最後一定要睇《七種武器》，最大感觸就係佢嘅核心唔係歌頌嗰七種美德，而係教你面對一個更殘酷嘅問題
當你失去所有嘢，輸到甩褲之後，你手上仲剩返啲乜，而嗰樣嘢，點樣可以變成你嘅武器。
或者咁講，其實可能唔係「細個鍾意睇金庸 大個鍾意睇古龍」，而係金庸寫嘅比較啱成功人士睇，古龍比較啱失敗人士，即係我呢種人睇
