一、銷量重挫 + 毛利下滑 = 基本面惡化成事實
Tesla 最新公布嘅2025年Q2業績顯示，全球銷量錄得過去十年最大跌幅，雖然 Elon Musk 仍然高調宣稱未來會推出全新平台車款與 Cybercab（自動駕駛的士）計劃，但現實係：現有主力產品正被比亞迪、現代、Kia、甚至小米等廠商逐步蠶食。
Model 3 及 Model Y 銷量已明顯見頂，連官方都不再強調交付成長，而係開始講「長遠平台」、「全自動駕駛 FSD」、「機械人 Optimus」等尚未商業化的新概念。當主業開始無以為繼、銷量靠減價維持、毛利持續萎縮，基本面轉弱早已係事實。
而車市競爭愈趨白熱化，內地新勢力「卷」到離晒譜，歐洲禁燃政策被延遲、美國電動車補貼亦愈來愈傾向本土化（Ford、GM獲益更多），Tesla 正面對真正的「成長瓶頸」。
二、Elon Musk「玩政治、玩火箭」，已非Tesla最佳CEO
Elon Musk 一直係 Tesla 最大嘅品牌資產，但而家反而成為最大嘅風險因素。佢喺社交媒體 X（前Twitter）上發表極端政治言論、深度介入美國保守派政治、喺 SpaceX 同 AI 項目上投入大量時間，而 Tesla 呢邊卻幾乎處於 autopilot 模式。
當 CEO 專注力轉移，Tesla 內部管理層出現大幅流失（包括多位核心工程及生產主管），品牌形象亦出現劇烈反轉。特別係美國年輕人與女性消費群體中，Tesla 不再係「未來感代表」，而係「老男人玩具」。
另外Tesla 官網與門市銷售體驗大不如前，用戶對售後、維修、品質嘅投訴屢創新高，而 Elon 明顯無意處理這啲「地面」問題。
三、估值離地，炒概念隱藏巨大風險
Tesla 市值仍高達10,000億美元左右，市盈率接近200倍，遠高於其他 Magnificent 7 成員（例如 AAPL 約30倍，MSFT 約40倍）。呢個極高估值背後，並非基於汽車主業，而係市場對未來自動駕駛 FSD、Tesla Bot（機械人）業務的狂熱幻想。
但你要問一個現實問題：呢兩項業務目前有穩定收入嗎？盈利模型是否成熟？有哪個監管機構承認 Tesla 嘅自動駕駛可取代人類司機？短期內 Optimus 又真係可以商業化咩？
FSD「永遠Beta」、機械人只係Prototype展示品，全部只係 Musk 擅長的「夢想推銷術」。當市場冷靜返嚟、當利率持續高企、當增長無以為繼，呢種「估值建立於幻想」的泡沫遲早要爆。
Tesla可能仲未爆，但已經「唔值得博」
唔會話Tesla會短期內破產，但作為一隻股票，佢已經唔再值得持有或長期投資。基本面轉弱、管理層分心、估值超貴、競爭對手崛起，再加上宏觀環境唔利——種種跡象都顯示 Tesla 已經唔係嗰隻大家熟悉嘅超級增長股。
如果你仲持有 TSLA，建議你認真思考：
呢個估值係咪仲有上升空間？
你信 Elon Musk 仲有幾多「魔術」可以玩？
而家呢個價格入場，仲係投資，定係賭博？
