英國政府近日成立新委員會，提前審視國家養老金政策，傳出計劃將國家養老金申領年齡逐步推高至74歲，引發輿論熱議。有專家直言，一旦落實，將出現英國史上最大規模嘅「退休貧窮潮」，對移英港人等新一代海外居民影響尤其深遠，有人憂心自己「做到死都未夠資格攞一毫子」。
政府擬再加退休年齡 恐成低收入族「最後一擊」
根據《Wales Online》報導，英國政府已於本月正式成立養老金專責委員會，警告未來退休人士將比現時平均每年窮 £800，形容國家正面對一場「退休人士貧窮海嘯」（tsunami of OAP poverty）。雖然現時退休年齡已定於2026至2028年間由66歲提升至67歲，並於2044至2046年間再升至68歲，但新建議更激進：
• 2048/49年升至69歲
• 最終於2068/69年推至74歲退休
而三重鎖定制度（Triple Lock）即養老金需跟通脹、工資或2.5%增幅中最高者調整——成本高昂，亦成為年齡推遲嘅主因之一。
移英港人：擔心打足幾十年都攞唔到錢
對於一眾經BNO簽證移居英國嘅香港人，呢個新發展更令人心寒。有港人網民直言：
「我30歲嚟英，做埋份工、交晒稅，到74歲先有資格攞國家養老金，咁我仲有幾年活？定係根本預咗我攞唔到？」
亦有人指出，港人家庭多靠自住物業＋儲蓄養老，喺英國租樓＋交稅＋生活成本高，根本難以為退休儲足夠資金，依賴國家養老金本來已成唯一出路。
現實殘酷：35年供滿 NI 每週最多 £230.25
根據政府資料，2025/26年度，若供滿35年國民保險（NI），退休後每週最多可領取 £230.25（約港幣2,300元），一年約為 £11,973。但據退休生活最低標準調查指出，要維持最基本生活水平需 £13,400/年，有較高質素生活則需 £31,700 起跳，兩者相差甚遠。
年輕港人恐成「生前冇退休」一代？
有政策分析指出，若真將退休年齡推至74歲，等同於人均壽命 83 歲嘅社會入面，只留畀退休人士不足 10 年自由時間。對一班依家30、40歲喺英生活嘅港人而言，「做到死都冇退休」唔再係戲言，而係非常現實嘅可能性。
英國政府為應對高齡化與財政壓力，準備掀起養老制度大改革。退休年齡步步推高，對一眾努力打拼、希望安享退休生活嘅移英港人來講，係一記當頭棒喝。
唔好係香港先黎突然愛國 (貨)
睇唔到佢長遠點運行落去