話說波士頓大學、Berkeley加大同西北大啲研究仔一齊夾計，終於砌到粒prototype出嚟，仲即刻發paper去《Nature Electronics》晒命。佢哋用咗啲矽base「微環共振器」做量子光源，靠非線性光學效應生「相關光子對」（Correlated Photon Pairs），呢啲Photon Pair就係玩量子通訊、感測、計算嘅Qubit骨幹嚟。
咁Qubit最大問題就係超唔穩，環境少少風吹草動都出錯，要成日冷凍、控溫，成個成本爆晒煲。點算？人哋班科學仔勁喇，每個共振器都塞咗光電感測器同微型加熱器，個Chip入面有控制邏輯，實時監察同自動校準共振頻率，唔理溫度亂定有電磁干擾，都可以穩穩陣陣產量子光，勁到喊。
呢個設計就等於Chip有自我監控、自動校準功能，穩定性爆燈，為將來大規模封裝同量產打好底。
依家量子技術熱過打邊爐，呢類混合晶片之後可以玩到安全通訊網、頂級感測器、量子電腦架構，最正就係可以穩定產生同控制Photon Pair，對量子網絡嚟講簡直係神卡。而且有即時控制、片上整合，對系統穩定性同精準度都幫到手。
https://technews.tw/2025/07/21/world-first-hybrid-chip/
