浸大舊生呼籲千祈唔好入浸大「救得一個得一個！」
普通話門檻、Cut科、獎學金不公
🚨千祈唔好入浸大！救得一個得一個！
最後倒數！JUPAS選科改選截止在即，但係好多慘劇已經被遺忘，所以我哋一班浸大舊生都要出聲。如果唔想白白浪費四年大學，請認真睇清以下四大理由：
一、全球最苛刻普通話畢業門檻
浸大係全港唯一仍然死攬普通話畢業門檻嘅大學。
中小學已經普教中九年，入到浸大都仲要讀普通話，係拼音轉文字、文字轉拼音嗰隻，係學生每個學期都要死搶爛搶嘅「熱門課程」，因為唔合格就唔俾畢業！
學生全面抗爭、校內公投都唔改，高層完全漠視。好多大學已經跟進改善，淨係浸大繼續攬住惡策唔放，成為全球對學生普通話要求最高嘅大學。
最低能嘅係，其實浸會珠海校區都會頒發同香港一模一樣嘅證書，唯一分別就係，喺珠海讀浸大，都唔需要讀普通話。睇完你真係好鍾意浸大嘅話，不如你去珠海讀。
二、不停cut科殺系，呃人開廢科死撐人氣
因為學校表現太差，資源不斷被cut，連教育系都可以話冇就冇。
但同時又巧立名目開咩「數碼AI」、「跨學科」、「人文光譜」、「無主修」等前景意義不明嘅新科，聲稱創新，實際上根本係呃學生入嚟篤數，完全唔理畢業出路，千祈唔好俾呢啲包裝呃！
三、中學式「全人教獄」：入咗嚟仲以為返緊中學
浸大唔係俾你專心讀自己主修科，而係搞一大堆必修通識：
中文、英文、數學、體育、宗教、普通話、歷史、演講⋯⋯全部計GPA，拖慢進度，心力交瘁。
所謂「全人教育」變成「全人教獄」，保你可以儲夠十年中學生涯，夠你懷疑人生。
四、本地生極少獎學金，大陸生先有高額著數
本地學生最高只係免學費，但大陸生竟然可以攞高達$227,500嘅專享獎學金！
明明係香港學校，但政策完全向大陸生傾斜，根本唔當本地生係人。
另外：校園細、宿位少、餐廳多蟲、行政垃圾⋯⋯罄竹難書。
📢 JUPAS選科更新截止：7月19日！
最後關頭，把握機會重新揀！唔好等放榜先嚟後悔！
一樣DSE分數，有更多更實際更著數選擇，去外國好，去教大、嶺大、恒大，乜都好過浸大，至少讀得開心啲。
快啲SEND畀考完DSE嘅朋友，救得一個得一個！
source:https://roothk.org/hkbu/
