噚日晨早返到公司準備開會,突然office枱頭電話響,一拎起就有條友講嘢:「唔好意思呀,今日有啲唔舒服,我想請假。」
因為我畀老細催緊,已經周身唔得閒,咁我就好快答:「OK!」
開完會我發覺唔多對路,自己條team齊晒腳,咁邊個請假?
我:「你哋今朝邊個打返嚟話Sick leave?」班同事你眼望我眼。我再問:「係咪銷假呀?明明有人話唔舒服今日返唔到。」
其中一位同事答:「你check返邊個打畀你啦!」
我:「唔係打手提電話,係打我枱頭,冇來電顯示,又冇講名,我都唔認得係邊個。」
同事:「咁你點應?」
我:「嗰陣忙緊啲嘢咪批囉!」
同事:「唔知邊個你又批?」
我:「咁病假唔通唔批呀?」
因為我公司得廿個人,一眼睇晒,全部人有返工,咁邊個請假?
點知今朝我又收到個電話,對方態度勁惡劣:「噚日邊個批我放假?係咪你條木咀呀?」木咀係咩年代嘅詞彙?
無啦啦畀人呼喝,我個心都離一離,但我好快回覆平靜:「先生,你搵邊位呀?有冇內線?」
「呢度係公司呀?定係你屋企電話?」
我:「呢度係公司,先生你有冇話搵邊位同事?我幫你駁過去吖!」
「我點知邊個同事呀?你公司同我公司個number好似,噚日我打咗過嚟請病假!」
我:「點會呀先生。」
「點樣唔會呀!我睇得返打出去個紀錄,我係打咗你而家呢個number,有條契弟批我放假,今日返到公司,老細話我曠工呀!」
我:「咁我有咩幫到......」未等我講完,嗰位怒漢已經先行cut線。
而家咩年代呀?仲會打錯㗎咩?你公司電話就save低佢吖嘛!