依個post主要係寫俾考得未如理想嘅同學仔，可能寫嘅嘢同「阿媽係女人」差唔多，或者可能有啲離地，但希望會有啲幫助
不得不承認公開試係人生一個重要里程碑，確實會好影響你嘅未來，但佢唔係人生嘅全部。人生有好多個十年，一次失敗唔代表永遠失敗，一次成功亦唔保證永遠成功。
考得唔理想，唔開心好正常，但唔好將負面情緒收埋。整理好心情後，諗吓點解今次發揮未如理想，可能會係：
• 環境問題：成個環境完全係讀唔到書，可能係屋企日日家嘈屋閉（有啲CLS屋企人），學校環境完全讀唔到書（例如比bully），成個心思根本focus唔到喺讀書到，單純係想解決眼前問題
• 心態問題：因為某啲原因導致完全無心向學
• 狀態問題：可能太緊張，發揮失準
• 粗心大意：平時唔會錯嘅題目今次錯晒
• 高估自己：以為準備充足，但其實未夠熟
• 準備不足：根本就冇溫夠書，成績同能力無關
• 更殘酷嘅情況：可能你真係唔係讀書嘅材料
最重要係反省：搵出問題所在，諗吓點樣改善。個問題太大嘅話就嘗試將佢break down佢逐part逐part去改（sadly唔係所有問題都可以解決到，真係解決唔到就唯有慢慢接受），唔好永遠沉溺喺負面情緒，覺得咁就一世，覺得一次失敗就玩撚完好似世界末日咁
真係整理好晒心情就要認真諗吓下一步點走
1. 考慮其他學位/重考：如果入唔到心儀大學或學科，而家庭經濟許可，retake/讀其他學位再入返心儀嘅大學同科目係一個選擇。讀多幾年書真係好小事，大部分僱主唔會理你考咗幾次DSE（你搵工嗰陣比hiring manager仲老另計）
2. 認清自己：如果真係唔擅長讀書（At least 有認真溫書衰咗先有依個結論），諗吓自己擅長或有興趣嘅領域。興趣未必即刻變成收入，但做完全無興趣嘅事好難堅持
3. 試多啲：完全唔知做咩？試下接觸唔同嘅領域，睇吓邊樣啱自己。想像長期做某件事，會唔會真係得到你想要嘅生活
我知道好多嘢知易行難，有setback唔開心同會鑽牛角尖好正常，但想講嘅係唔好永遠沉溺喺啲負面情緒到，始終唔開心完之後都要繼續生活繼續行下一步，真係抽離唔到負面情緒就試吓用第三人稱去整理自己心態同行為，可能會有意想不到嘅效果
