多名自提點員工同時在網上發文呻辛酸，有曾連續工作17小時的員工，揭露日常慘況，他怒轟客人「自私」：「點解你哋要咁自私唔畀我走！」「我真係第一次做到我冇晒心機！」
網購平台洶湧襲港，上月底再遇上拼多多與順豐終止合作，令多區的自提點空前逼爆，人龍超長，有人要排隊4小時才能取件。自提點逼爆大收旺場，不少人好奇自提點職員的薪酬有多高，早前網傳沙田水泉澳有自提點以3萬8千元天價請人，但後來證實作假。
勞工處自提點員工招聘廣告 至今未請到人
勞工處求職平台有招聘自提點職員的廣告刊登，曝光自提點員工的薪酬，該職位名稱為「售貨員/店務員」，但列明職責為「一般集運自提點工作」，工作地點在荃灣西，時薪每小時55元至60元，每日工作9小時，早上11時至晚上8時，每周工作6日，輪休。招聘列明，應徵者須有專上教育程度，一年工作經驗，懂一般粵語、普通話及英語。
部分網民驚訝於自提點職員時薪並不特別高：「55蚊一個鐘，每個月都係萬四左右。」目前本港最低工資為每小時42.1元，有網民認為自提點職員人工僅「比最低工資略高」，有人認為此人工寧選擇做保安員。該職位於上月25日刊登，至今仍未聘到合適人選。
另外，有部分網民指出，社交平台最近流傳大量招聘自提點員工的廣告，聲稱時薪高達100元，但有人應徵後卻變成傳銷騙局，或免費試工，懷疑是假招聘廣告提醒小心。
自提點員工籲將心比己：唔好咁犯賤啦，唔好咁自私啦
近日，多名自提點職員在社交平台發帖大呻工作苦況，其中有年僅22歲的自提點員工發表逾400字長帖訴苦，他不滿客人「自私唔畀我走」，又表示雖只22歲，但日做夜做已做到「我隻手舉唔高，我隻腳又痛」。
他說，自己的店舖晚上7時收舖，「我已經執舖執到1910（晚上7時10分）先開始埋數，我已經連燈都閂埋」，但仍有客人不理店舖已關門硬要取件。他引述客人諸多藉口，例如「攞埋我你先走啦，好快啫。」「點解你唔識體諒我，畀我攞埋。」「反正你都未走，拎埋我都冇所謂啦。」「OT攞埋我咪啱。」等等。
他指「幾乎返7日有6日都OT（超時工作）」，平日一至六要工作11小時，有時甚至由早上7時至晚上12時，要連續工作17小時。他在帖文中怒斥客人：「點解你哋要咁自私唔畀我走......你哋可以攞完貨，返屋企嘆冷氣，其實我唔係㗎，我仲要自己執好個場佢......點解唔下次早啲嚟攞？......你係要等我收工嘅時候嚟攞。唔好咁犯賤啦，唔好咁自私啦。」他無奈表示已經辭職不幹：「以前幾攰都唔緊要，我真係第一次做到我冇晒心機」，他呼籲大家「將心比己」。
「逗個少少人工賤過地底泥」
另有自提點員工亦發帖批評有客人「無禮貌同Ｘ街到極點」，他形容自己「逗個少少人工賤過地底泥」。
他形容日常工作中動輒被罵：「多人要排隊可以鬧一餐，菜鳥拎淘寶要掃碼取件可以鬧一餐，自己（指客人）無留意件貨過晒期又鬧一餐，甚至教啲阿嬋點㩒開條msg，佢一嘢打開我隻手。」不過，他補充不是所有客人都是無禮貌：「不過都有好多客好nice，好好人。」只是當自己遇上無禮客人「就係會破壞你成日嘅心情」。
網民留言打氣：感激！辛苦了！
有自提點員工發帖形容「真係CLS，一日比一日多」，貨物量堆積如山，「我間舖50呎都冇，仲細過間酒店房」，「仲要件件到20kg以上」，實在難以應付。
網民紛紛留言為自提點職員打氣：「真心，感激！」「辛苦了！」「能力越大責任越大...」「勞苦功高，感謝你們！」
覺得人工低咪唔好做
