VIVA當然就係音樂會嘅跳唱擔當,佢哋仲率先劇透會以Summer Look現身添!「我哋會以拿手唱跳歌炒熱氣氛,音樂會喺星期六晚舉行,大家同我哋齊齊High爆唱跳一夜,星期日都唔使俾『Morning Call』叫醒返工。」而海兒亦準備好大騷「最強唱功」焫著一眾現場觀眾,佢表示:「雖然大家稱呼我為『海兒老師』,其實我都有貪玩一面,期待喺騷上釋放。」
至於CY就話會喪唱經典廣東歌:「參加《全民造星III》時,大家都覺得我嘅歌聲似陳奕迅,自己都好期待翻唱Eason經典歌。而Show肌重任都係交俾大隻仔Zpecial嘅康聰同煒賢,小弟無謂顯醜!」Zpecial笑稱:「天氣咁熱,我哋平時都會著背心出騷,難得嚟水上樂園夾Band,更要配合場地。」


