近年成功轉型KOL嘅陳凱琳，更喺媒體廣告分析平台admanGo公布嘅今年第1季（1－3月）十大IG品牌內容廣告銷售額（IG Branded Content Ad spend) 最高KOL當中排第2。網上廣告搵得多之餘，陳凱琳仲創立自家朱古力品牌，早前更加同本地小食媽咪麵crossover，將即食麵加入呢期好hit嘅杜拜朱古力，以228蚊嘅售價推出。Grace搵咗唔少美食KOL一齊宣傳，而佢拍片介紹專賣呢款朱古力嘅pop up store開張當日，似乎有唔少朋友到場支持。
不過有明星效應都要好味先得嘅，youtuber大陳試食完陳凱琳推出嘅媽咪麵杜拜朱古力之後，鬧爆係「垃圾」，食唔晒之餘仲喺鏡頭前掉入垃圾桶！
大陳鬧爆媽咪麵朱古力
未食晒就掉入垃圾桶
大陳試食嘅係$38個嘅媽咪麵開心果麻糬撻同埋$228嘅開心果媽咪麵黑朱古力，佢話將媽咪麵加上開心果麻糬撻，「搞到好似廚餘咁樣」，而黑色撻皮就「好似燶咗」，深綠色嘅醬好似坑渠水。外表以外，大陳批評「將啲又軟又硬又唔夾嘅嘢撈埋一齊，好似將食剩嘅嘢合埋一齊」，仲話食到無名火起一嘢整爛佢算。至於舊朱古力，大陳就鬧開心果、媽咪麵同黑朱古力係唔夾，即使加多啲媽咪麵都唔覺得好食，甚至話所有嘢當中唯有包媽咪麵係食得晒！最後大陳冇食晒所有食物，再憤而掉晒入垃圾桶，話係「送返去應該去嘅地方」，並批評「你自己冇試過俾人食嘅咩？」。
雖然俾人負評，但係嚟緊陳凱琳嘅朱古力品牌會同本地一間平民餅店合作，推出朱古力大福，各位有口福啦。
Link: https://hk.news.yahoo.com/%E9%99%B3%E5%87%B1%E7%90%B3%E6%8E%A8%E5%87%BA%EF%BC%84228%E5%AA%BD%E5%92%AA%E9%BA%B5%E6%9D%9C%E6%8B%9C%E6%9C%B1%E5%8F%A4%E5%8A%9B-youtuber%E9%A3%9F%E5%AE%8C%E9%AC%A7%E7%88%86-063039757.html
