[斐濟遊記] 美麗的島民與海

斐濟，一個時常出現喺最快樂地方頭幾位嘅國家。除咗欖球之外，呢度仲有熱情友善嘅人同埋美麗嘅海，重點係香港有直航過去，好方便。咁啱上一年過得唔太如意，想轉換下心情，就同老公去咗兩個星期斐濟，住下小村落嘅homestay，潛下水，感受一下呢個太平洋島國嘅純樸同快樂。

今次總共去咗12日，頭尾留喺城市，中間大部份時間喺外島Yasawa Islands:

Day1: HK-Nadi
Day2-4: Lautoka
Day4-7: Ganu village Homestay (Naviti Island)
Day7-10: Barefoot Mantaray Resort
Day10-12:Nadi
Day12: Nadi-HK

都想試下去
果邊安全點？ 嘢食方面又點？有咩玩？

力架

等到了

留名

留名

留名

物價如何

[Day1]
我哋係上年5月出發，嗰時見到Fiji Airways機票每人連稅$6100覺得好抵就買咗
好耐無搭過傳統airline，啲乘客大部份睇落似返印度同中國探親嘅人，香港遊客好少



香港去斐濟Nadi嘅航班需時9個半鐘，每個位preset咗d好少女粉紅嘅咕𠱸同blanket



下晝5點起飛，起飛之後有晚餐食，味道都唔錯



Fiji水放題


臨降落有早餐

[Day2]
斐濟時間比香港快4個鐘，當地時間第二日朝早7點就嚟到Nadi喇，機尾個圖騰真係好靚


機場有人唱歌歡迎遊客，幾好feel

唔知係咪太早返工，右邊嗰個好揸流攤，係咁了鼻屎

出閘之後喺場買張電話卡，之後去到外島都收得唔錯
(1FJD=3.5HKD)


以前嘅我哋應該會等巴士出市區，但而家老了，買完電話卡就上的士去Lautoka。沿路覺得斐濟嘅地形好得意，好多時都係一大片好平嘅平原，然後有啲拔地而起平頂嘅山咁

不過斐濟啲的士都好scam，我地搭左幾次都係態度好差既印度佬司機，無跳錶之餘每次落車比錢都同上車講好個數唔一樣，貴得FJD10-20，忽然覺得香港d的士佬都算係咁

Lautoka係繼Suva之後喺主島第2大嘅城市，主要出產蔗糖，有好多製糖嘅工廠，比起Nadi同Suva少遊客。我哋住呢度一嚟想避開太多遊客嘅地方，二嚟就係之後homestay個host話可以開船嚟Lautoka碼頭接我哋，反正臨走嗰兩日都會住Nadi，呢兩日就喺度住下啦。
呢兩晚住嘅酒店


太早未checkin得住，去咗附近間M記嘆冷氣


酒店d職員都好好，朝早10點幾就放我地入房




沖好涼瞓一覺就去海邊散下步，第一個印象係斐濟人真係好高大，而且感覺真係好開心好休閒，個個都會好好笑容咁同你講bula，加埋佢哋嘅爆炸頭髮型，成件事好鬼cute
爆炸頭示意圖


行到下晝5點左右就去搵餐廳食晚飯，點知d餐廳已經陸續閂門話唔做生意 去到6點已經成條街收哂皮


唯有死死地氣返酒店餐廳食pizza


今日休息下，聽日去玩泥漿浴

d水好冇飲，成日感覺越貴既水覺得有d怪味

LM 支持! 樓主終於出新遊記

留名支持
係咪城市先會有餐廳做晚市
同沿途有無見過一個人去旅行

[Day3]
呢一日去玩泥漿浴，呢個應該係嚟斐濟大家都會去嘅行程


我地約左11點pickup，去到之後啲爆炸頭阿姐會做下簡單講解，然後就可以換衫自己慢慢玩。
溫泉泉眼，後面係更衣室


同以前喺哥倫比亞浸過既泥漿浴唔同，呢度無得自己挖泥，啲員工會喺唔知邊度挖好左一桶桶火山泥俾你用

啲泥幾滑，無乜怪味，不過間中會有啲沙石同幾條草咁，都唔建議搽落皮膚度太大力省


首先將泥搽勻全身

然後阿姐會指你去一塊草地度叫你晾乾自己，話當你由黑色晾到乾變到灰色就可以浸落溫泉洗走啲泥喇


溫泉池有4個，跟住冧巴順次序浸，啲池水一個比一個乾淨，亦一個比一個熱。呢個1號池就最raw

然後愈嚟愈乾淨


最後個4號池好似泳池咁清，但就好熱，無乜人浸

以前浸過啲泥漿浴浸完之後皮膚可以滑成個星期，但呢個似乎就無呢個功效，皮膚無滑捋捋嘅感覺，不過嚟玩下泥浸下溫泉都幾好玩嘅。

然後就可以換返衫喇，想乾淨啲都有一格沖涼房可以沖下身

溫泉池邊有d攤檔仔可以買紀念品


每樣都唔貴，都係5FJD，最後因為店員太熱情所以買左兩條鯊魚牙手繩同條巾

呢度無限時話玩幾耐，我地最後逗留咗個零鐘，啲職員見我地無所事事行嚟行去就叫司機接返我地走了。回程時唔知係咪司機夠鐘返屋企食飯，中途去接左另一個肥叔叔，司機就收工返屋企

之後再由肥叔叔接力送我地返酒店，斐濟人果然好work-life balance，該收工時就即刻收工，好值得學習。

休息左陣之後我地又出去行下


佢地啲衫睇見都好開心

呢件波衫好靚，但係勁厚，香港夏天著可能會中暑

商場入面有個foodcourt，大部份都係印度野，求其食左d momo，話時話呢度都幾多印度人


嚟緊幾日都係喺島，host話佢地村無舖頭，驚到時肚餓所以去supermarket買定啲餅乾充飢，順便參觀下超級市場，同買定啲洗衣粉洗衫


啲M巾勁抵，唔使10蚊港紙一包

呢度都買到美源髮彩

[Day4]
出發去外島homestay喇~
我地會去一條叫Gunu嘅小村莊住4日3夜，佢位處於Naviti Island，喺受遊客歡迎既Yasawa群島南邊

其實斐濟有好多村莊都開放俾遊客探訪，但好多都係day tour形式，去睇下佢地唱歌，飲下kava就走。我地想住喺條村度感受多啲，所以就揀咗住homestay喇。

成個Yasawas都有唔少homestay，我地就喺airbnb揀左呢間Eseroma homestay，啲評價好高分，睇相啲野食有魚有肉好正咁
(airbnb上面嘅資料圖片)



二人房每晚HKD$250，包埋3餐就每人每日加$190，可以再額外加錢去釣魚行山咁

另外都有好多free activities，同啲村民friend咗佢地就會帶你周圍玩

由主島出發可以搭由Nadi渡輪Yasawa Flyer，不過個host話佢咁啱去開主島買野，可以揸船黎Lautoka載埋我地，價錢同渡輪差唔多，但就可以瞓晏啲先起身，所以就叫左佢嚟碼頭接我地喇。

11點黎到Lautoka wharf



host全家都係哂度

肥佬host係個多仔公，有4個小朋友，老婆而家仲大緊肚陀住第5個 原來斐濟政府規定懷孕超過7個月嘅外島大肚婆就要返主島待產，等BB出世後健康出院先可以同媽媽一齊返屋企，多仔公老婆個肚已經8個月大喇，所以佢今朝順便帶埋兩個大d既小朋友黎探下媽媽。

開船lu，除左仔女佢仲帶左兩個姨甥女嚟幫手

碼頭嘅岸邊有好多工廠


原本以為搭個零鐘船就到，最後搭左2個半鐘，曬到燶咗 搭到中途啲細路已經隨地碌低瞓哂



啲水開始愈黎愈清


見到Gunu村喇



喺斐濟嘅村落都有啲規矩要守，例如要帶sevusevu做見面體、女仔唔可以著短裙短褲要包sarong、男仔唔可以打大赤肋、唔好摸人個頭之類，不過我地買唔到sevusevu，所以捐左25usd比佢地學校就算


藍色呢間就係我地間屋，隔離白色嗰間就係3－5人dorm



入面望落都幾骨緻，但瞓落發現張床係暗濕同埋臭嘅

廁所竟然有馬桶，係同其他住客share用嘅，隔離屋係個芬蘭妹，靚靚女女但成日都屙完屎唔沖廁

浴室都竟然有水龍頭，好驚喜，我原本仲諗住係要用個水桶打水沖涼之類

但係廁所就無燈，所以要日落前沖好涼，或者戴住頭燈去廁所。

因為佢地媽媽去左待產，所以host叫左佢表姐Sana姨姨黎照顧我地三餐。可能因為係咁，啲野食都無資料圖片睇到嘅咁正，原本睇相係有魚有雞咁，最後日日都即食麵同木薯(?)咁滯
黎到第一餐lunch係美極麵配飯


其實Sana姨姨好好人，不過佢要湊住自己3個女+多仔公4個塞豆窿極度心力交瘁，多仔公又永遠成pet屎咁攤喺地完全零幫手，姨姨有時仲會攰得滯瞓過龍唔記得煮飯好在我地對食物都無乜要求，但求果腹就算

食完飯小朋友們帶我地去斟水，村中間有個大水缸，佢地話係收集返黎既雨水嚟


飲落好清甜，一啲怪味都無，而且飲左幾日都無肚痛，仲好味過之後幾日喺resort嘅水㖭。

host同啲小朋友落咗海玩水，我地自己喺村入面周圍行下


海灘邊有個鼓，每朝5-6點都有村民打鼓morning call大家起身，然後佢地就會一齊喺教堂唱聖詩

雖然朝朝都比佢地嘈醒，但佢地唱歌真係好好聽，聽聽下好快又訓著返

玩下狗攤抖下好快就日落，呢度連d狗都懶過人

安全還好呀，都係市中心就雜亂啲咁。
嘢食就唔好有啲咩期望，食得飽就算
我地主要係玩海同體驗下country life，仲有可以行下山去下瀑布咁，都係啲大自然嘢

比想像中貴，m記貴過香港

好飲呀，村入面啲雨水最好飲好清甜

應該係近期內最後一篇了
而家養咗貓完全唔捨得留低佢喺屋企自己去旅行



雖然之前去咗東京個海豚島同睇脫衣舞都好好玩有啲想寫

我都想知
有見過！！Homestay 隔離房係個荷蘭女仔solo traveller，喺Nadi市中心間超級市場都見到個日本男仔，佢見到我地個樣勁驚喜，好似好耐無見過亞洲人咁

好似集中營咁見唯一一個亞洲人咁

d生活好寫意咁，如果自住，間屋靚少少就冇得輸

恭喜曬 貓貓祝福你

絲打終於有新遊記！