林家謙10場紅館騷全售罄男模特兒Kyle Wo炒飛斷正寸嘴回覆：買唔買個選擇喺你哋度

kaii_0421 2025-07-09 21:35:35

林家謙10場紅館騷全售罄
男模特兒Kyle Wo炒飛斷正
網民斥搞壞規矩：你仲賺得多過林家謙
Kyle Wo曾與家謙合作視作偶像
寸嘴回覆：買唔買個選擇喺你哋度

#林家謙下月將在紅館開10場演唱會，為避免黃牛搶飛令真正歌迷有騷冇得睇，家謙不嫌麻煩，以「預先登記抽籤」機制以抽籤方式賣飛，嘗試做到比一般售票方式更公平，同一時間，又預留7000張飛提供予CLS（家謙fans）以另一渠道購票。

今早10點兩場終極加場開售，中午卻有歌迷在threads踢爆，模特兒Kyle Wo在網上疑似高價放售林家謙演唱會飛，據cap圖顯示，Kyle Wo將$1080飛叫價$3000出售。由於Kyle Wo在其社交平台曾貼出與家謙合照，聲稱「與偶像的第4次合作好開心你每次都記得我」，惟炒飛行為明顯與家謙抽飛原意相違，激起不少網民不齒Kyle Wo所為。有網民斥Kyle Wo「帶頭搞壞規矩」、「枉你偶像係林家謙」、「你仲賺得多過林家謙」。

同時 #KyleWo 亦被發現活躍在炒賣演唱會飛行列，除了有在林家謙演唱會收飛及放飛，亦活躍於G.E.M.的啟德騷，似乎其黃牛都多瓣數。而Kyle Wo今早曾在IG Story表示成功搶飛：「又買到4張$1080林家謙，11張G.E.M.，仲有Stephy，炸了！」

直至其炒飛行為被揭發，他再連環出Story，態度強硬唔認錯，初時留言「隨便說」配花生emoji，之後又寫道：「笑死，啲人原來以為我係收人原價飛再高價放。喂大佬，我都list哂（晒）出黎（嚟）啲收據，就算問下價都得掛（啩）。開得呢個ac出，就緊（梗）係唔想買家中伏先用呢個ac，你當我真係冇諗過架（㗎）咩？咁買唔買，個選擇係你地到（喺你哋度）。原價出讓我就真係想睇下有幾多真呀，比（俾）人呃返轉頭唔好喊，所以繼續花生」。

#娛壹

蛋糕人 2025-07-09 21:37:14

稅務局