連繫人
2025-07-06 00:43:47
「我真係好奇怪，唔知點解自己明明係男仔但係會鍾意男仔。至少由小學嗰時已經開始係咁。明明寫好封情書擺喺自己心儀男仔櫃桶底，諗住咁佢會對我心心眼。點知個衰仔唔單止唔知道我心意，仲要夾埋其他男仔一齊bully我，話我係乸型唔好同我玩。搞到我之後都溝唔到仔！升到中學揀咗男校，諗住會搵到自己心儀嘅伴侶啦。點知隔離檯David溝到仔。後面個Benny 仲要濫交，有好多個男朋友。而我，見到某個男同學對我主動同我傾計就加咗個whatsapp ，初頭佢仲對我互傾幾句嘢，之後就開始唔知點解已讀不回。經走廊先發現佢同第二個高大師兄十指緊扣，我真係心都碎埋，之後都係識唔到男朋友。上到大學就更加唔好講。D人唔係有女朋友就係有肌肉佬做男朋友。我自問都算係文青feel樣嚟。但一開口同其他男仔講嘢都好難講到好深入，連發展感情嘅基礎到無。出到嚟社會，街頭flirting 試過，落 gay bar 試過，交友app 都試過，教會都試埋，都係識唔到。究竟我應該點算好？聽講連登係全港規模最大同性戀論壇嚟。唔知呢度有無人同我講吓要點樣先可以識到優質嘅男仔？年尾就30歲。我唔想因為識唔到男朋友而要做魔法師啊！」