陳瀅搣甩「肥瀅」污名　拋胸晒線騷Quali

鳳凰城大腸 2025-07-06 00:03:02

陳瀅今日（5日）出席活動，修身成功的她大騷哥利，穿上Deep V短裙大騷南北半球及長腿，被指身上千萬鑽飾不夠其完美身材價高，她連聲多謝，自言一直為新劇《璀璨之城》Keep Fit：「因為可能有大膽啲嘅場口，要着少啲衫。（有幾大膽？）劇本仲執緊，我仲未開拍，不過我做緊肌肉訓練，唔太着重磅數，係要增肌，依家手臂有啲粗，希望有最靚嘅馬甲線，條線出緊嚟㗎啦。（成個人瘦晒喎？）所以依家唔係追求磅數。（係你最瘦嘅階段？）應該係10年前影寫真嘅時間，依家同當年仲差5磅。」對於搣甩「肥瀅」之名變「苗條瀅」，她開心謂：「多謝，依家係興白同微胖。（你咪唔使減？）我希望大家愈嚟愈接受啦，唔係愈瘦就愈靚，咁大家唔使咁大壓力。」

陳瀅又謂減肥以做運動為主，半年期間做到腰痠骨痛，但覺得值得，每周做3至4次，有時跟JW齊踩室內單車。問到JW傳拍拖，她即反問：「係咩？（唔好扮傻啦？）不如講番我身形啦。（見過JW男友？）我聽聞過，但我又唔會干涉大家嘅私人感情事，大家想講時咪講囉，我每次見佢就係踩單車。（JW感情未夠穩定？）唔清楚。（緋聞男友周嘉洛可滿意你身形？）所有朋友見到我都覺得我精神咗同健康咗，都有同嘉洛同朱仔（朱敏瀚）做運動。（嘉洛身形好唔好？）好啩，佢身形一直都好好。（有冇約朱仔緋聞女友陳曉華一齊？）咁又冇，因為我哋都係《痞子》嗰班人。」