今日見到鴻星中菜全線結業，好多人又喺度唉聲嘆氣，話又一間集體回憶無咗。我知我咁講，又會有班 Haters 話我涼薄、幸災樂禍、踩多一腳。但我嘅宗旨從來都係一樣，只要有正確資訊同分析，就要拎出嚟講，唔好俾人誤導。
鴻星執笠，我會形容係市場淘汰劣質選擇嘅一個健康現象。佢哋自己都賴經濟差，呢個係我聽過最懶、最唔負責任嘅藉口。
我哋用返數據講嘢：
1. 香港經濟根本唔係差：我哋關注組成立喺2020年12月，過去四年半香港GDP一直有增長，實質年增長3.1%（連續10季上升）。失業率由2020年嘅6.6%大跌到本月嘅3.1%，工資中位數都由$18400升到$20500。你同我講經濟差？數據就係最好嘅證明，經濟係向上行緊。
2. 真正死因係性價比低：經濟唔係問題，咁問題喺邊？好簡單，就係性價比低到無倫。一個集團，幾十年來食物質素無乜進步，價錢就識得跟通脹加，但質素完全跟唔上。你埋單一個人閒閒地幾百蚊，食到啲乜？可能係一碟唔夠鑊氣嘅小炒，再加一碟唔知擺咗幾耐嘅點心。市場係最誠實嘅，當你嘅價值配唔上個價錢，市民自然會用腳投票。
相反，我哋睇下兩餸飯點解可以逆市擴張，由2021年嘅280間，升到今年615間，增幅超過一倍。原因就係三個字：高性價比。三四十蚊，兩款餸大大份，味道唔差，起碼飽肚先。呢個就係市場最真實嘅需求。鴻星嘅失敗，正正就係被兩餸飯呢種高性價比模式所擊敗。
所以，我喺度要寄語香港其他仲生存緊嘅飲食集團，唔好再發夢，以為靠個名氣、靠食老本就可以生存。市民嘅消費習慣已經徹底改變，我哋要嘅係實實在在嘅價值。你哋要學嘅，唔係點樣整個靚靚裝修，或者請幾個KOL賣廣告，而係應該謙虛啲，去學習下兩餸飯點解成功。
再唔調整心態，唔將性價比擺喺第一位，我可以肯定咁講，鴻星絕對唔會係最後一間。市場唔會同情弱者，唔識變通，最終只有死路一條。
