依家個市，仲邊有懸念？就係「挾AI以令諸侯」嘅「魏王」NVDA。皮褸黃根本就係曹操再世，手握H100呢塊傳國玉璽，挟AI以令諸侯。無論你係MSFT定META，想逐鹿中原，都要睇佢面色，乖乖地進貢銀兩（買GPU）。AMD？Intel？不過係西涼馬騰、江東孫權，一時瑜亮，但始終都要隔岸觀火，睇住「魏軍」不斷擴張。
小弟呢幾年炒出炒入，積蓄有啲，但見住NVDA股價由百幾蚊殺到上千，好似曹軍破官渡咁，勢如破竹，自己手上嗰啲所謂「藍籌」、「收息股」，簡直就係袁紹旗下庸將，不堪一擊。再係咁，一世都財自唔到，一世都係喺度做阿斗，等阿媽打救。
「大丈夫當帶三尺劍，立不世之功；今不戰，更待何時？」
睇住SQQQ、SOXS班友，日日喺度念經，話咩泡沫、咩回調，好似孔明舌戰群儒咁，懶有道理。但大佬啊，你睇下個勢，依家NVDA嘅霸業已成，你走去做空軍？是咪想學關羽，大意失荊州？
所以，小弟諗通咗。普通咁買NVDA正股，已經滿足唔到我。正所謂「人中呂布，股中NVDL」。要玩，就梗係玩最大嗰瓣！NVDL，兩倍槓桿，就好似係曹操得猛將呂布，一日升幅，等於人哋行軍幾日。
我知道，all-in NVDL，等於將身家押喺赤壁之戰。贏，就火燒連環船，直取天下，財自退休唔係夢；輸，就敗走華容道，一鋪清袋，返去M記做「薯兵」。呢鋪博嘅唔單止係錢，仲係一份「寧我負天下人，毋天下人負我」嘅決心！
今晚，我就會將所有資金，換成兵馬，盡數投入NVDL。
「今晚過後，若非財自，便是乞食。」
我唔會理咩止蝕，亦唔會聽淡友廢噏。我已經見到「魏王」皮褸黃企喺銅雀台上面，笑看天下。我哋呢班追隨者，就係佢旗下嘅虎豹騎，準備踏平一切阻礙。
Post已出，彈藥已上膛。各位手足，如果你同我一樣，唔甘心一世做個領兵仔，就一齊上船。我哋唔係買緊股票，我哋係買緊一個時代！
他日財自成功，銅雀台見！
如不幸敗北…咁…咁…唯有下年再出post。
