網紅「梨老師」在港曾任職幼稚園校長，她日前到意大利旅行，在梵蒂岡遇到一批缺德的疑似港人遊客，令她嬲爆在網上發帖作出大控訴。
她表示，到梵蒂岡聖伯多祿大殿的舖頭內選購聖水時，遇到一批行為缺德的疑似香港遊客，她指，該批遊客講廣東話，並將歐羅兌換為港幣，因此很大程度上相信他們是港人。
她表示，該在教堂內的舖頭很細「塞滿人」，而該批港人為選一枝「最完美聖水」及「最fit自己的戒指」，雖同一尺寸戒指亦左選右選，有人更研究「戴左手定右手好」，完全不顧身後有大批遊客排隊等候。
她表示，揀選最合適戒指沒有問題，但當後面遊客禮貌請她們稍為移步時，「呢班香港人就話：咪由佢哋等吓囉，唔使佢哋等啊？甚至乎話佢哋排咗咁耐入嚟，後面嘅人要排得更加耐。」
除了排隊方面的「首宗罪」外，第二宗罪是揀選聖水的離譜行為。她表示，這班港人為研究哪枝聖水「最滿」，竟「係到逐枝逐枝扭開人哋（聖水），伸隻手指入去摸人哋，睇吓邊枝聖水係最多，倒人哋枝聖水出嚟，睇吓邊枝係最滿」。
她指，該港人「倒人哋聖水時」，「（佢）隔籬個Friend仲話：你做得好啊，我啱啱都係咁倒出嚟。」
她表示，其他遊客見到即時喝止，但該批港人仍未有停手，「佢哋係轉個位，匿係角落頭，繼續倒人哋啲聖水。」
第三宗罪是付款時，教堂表明只收信用卡，不收現金，但該批港人卻堅持要付現金，「佢死都要畀現金，直至到職員頂佢唔順，搶佢張卡嚟嘟。」
帖文引發熱烈迴響，有網民問「梨老師」何不即場制止：「即刻出聲，同職員講返佢打開咗！」
梨老師留言解釋：「教堂間舖頭實在空間有限，而且入面只有一個職員收緊錢，想搵個職員幫手都冇辦法。」
不少港人留言指這班人「影衰」香港人：「真係好核突，揀都算，塞隻手指入去人哋個樽度係咩玩法。」「完全覺得佢哋真係好似冇接受過教育咁囉。」
https://hk.finance.yahoo.com/video/%E6%B8%AF%E4%BA%BA%E9%81%8A%E6%A2%B5%E8%92%82%E5%B2%A1%E8%A2%AB%E6%8C%87%E6%B1%A1%E6%9F%93%E8%81%96%E6%B0%B4-%E6%95%99%E5%A0%82%E6%8F%80%E8%81%96%E6%B0%B4%E9%80%90%E6%9E%9D%E6%89%AD%E9%96%8B%E5%A1%9E%E6%89%8B%E6%8C%87%E5%85%A5%E6%A8%BD-%E7%9B%AE%E6%93%8A%E8%80%85%E6%8F%AD%E9%82%84%E6%B6%89%E5%85%A9%E5%AE%97%E7%BD%AA-030000089.html
