何雁詩2017年介入鄭俊弘與富貴未婚妻Beebs的戀情，導致二人形象插水，同年鄭俊弘更被傳媒影到為愛犬戴釘帶，因而惹來外界質疑他虐狗，雖然都已事隔多年，但仍有不少網民攻擊他們，而當兩人公布兒子患上「天使綜合症」後，更有網民留言是「有報應」。對此，何雁詩就表示：「其實當我哋選擇去公開天使綜合症呢樣嘢嘅時候，都預咗一定會有咁嘅評論，所以都畀咗一段時間我哋自己打好個底嘅，我都唔係第一年入行，可能頭五年都會覺得人哋點講都會有啲難受。但又諗返起，因為呢個網絡世界實在賦予咗好多人power去講你啦，但當你諗返如果呢個人喺街度突然衝上嚟話『報應』呀！你會點呢？你唔會真係理佢㗎嘛，你又唔識我，你衝埋嚟突然間鬧我，我冇理由同佢拗，我唔係一個會咁樣講人哋嘅人，所以我唔想同網上鬧人嘅人同一個Level。」
何雁詩當年被指是第三者，至今仍有不少網民提起此事，對此，她就表示：「我明白點解有啲人對我哋有個睇法，因為佢哋對我哋嘅了解就係喺報章上面，報章上嘅嘢當然唔係我哋嘅全部啦，有好多嘢我控制唔到，我無謂再去深究咁多囉，我控制到嘅嘢就係我家庭開唔開心，我家人健唔健康，我開唔開心，呢啲係我會嘗試做好嘅嘢。」對於被指「唔識湊仔」，何雁詩坦言會不開心，但她就選擇不鑽牛角尖，將心思放在更正面的事上。
