2025年6月中旬，英國正迎來今年首個正式熱浪。根據英國氣象局（Met Office）定義，熱浪需連續三日氣溫超過指定門檻——例如威爾斯及北部英格蘭為25°C，倫敦及東南英格蘭則要達28°C。而今個星期，英格蘭中部、東南部，甚至部分西部地區，氣溫可能飆升至33°C，有望刷新今年最高紀錄。
對來自香港、習慣濕熱氣候嘅港人嚟講，30幾度聽落可能唔算咩。但英國大多數屋企冇冷氣，屋設保暖為主，夏天反而焗促難頂。無風情況下，室內氣溫長時間高企，加上英國冇太多降溫基建，會令人覺得比香港更難捱。
政府已向多個地區發出「黃色健康警報」，提醒市民避免烈日下長時間活動，補水降溫。呢幾日唔少移英港人已經湧入 Costco、Argos、B&Q 等門市掃貨，風扇、冷風機、移動冷氣機成為搶手貨，部分品牌甚至開始缺貨。有啲家庭更一早上網訂咗便攜式冷氣，希望可以「保命」。
作為移英港人，面對英國越嚟越熱嘅夏天，建議屋企預備風扇、遮陽窗簾、防曬用品、涼感毛巾等裝備。晚間若氣溫未能回落，影響瞓覺質素亦唔出奇。
呢場熱浪再次反映氣候變化下，極端天氣正成為英國夏季新常態。對於冇冷氣的英國生活環境，學識自我調節、應對酷熱，已經成為每個新移民都要面對的「生存課題」。
電撚又贏
