我同我女朋友係英國識嘅，都已經一齊左幾年，最近開始同居。
大概一個月之前，老母突然間急call我，同我講🐱貓嘅狀態好差，好似就嚟唔得，因為其實佢年紀都好大，已經差唔多20歲。
聽到呢件事之後，屋企人觀察咗一晚，跟住我朝頭早起身就買機票撲返香港，大概機票買咗兩個禮拜諗住如果仲有可能嘅話可以陪多貓貓一陣，唔得嘅話都想同佢搞埋後事。
貓貓由細到大都陪住我，對我嚟講都係唔止係一隻寵物，佢真係我家庭嘅一分子。返到去之後，女朋友因為我唔係佢身邊，焦慮症發作，一直咁樣同我嘈。同埋佢好介意我緊張隻貓多過緊張佢，所以就算我同佢講話我隻貓而家就嚟死，佢都要一直同我嘈佢，證明我鍾意佢多啲。所以基本上去到食完晚飯之後，我哋就喺度鬧交。就算我點樣同佢講都冇用，佢就係要嘈。如是者我哋就咁樣嘈咗三日，最後我隻貓就咁走咗。
本身英國同埋香港已經差咗八個鐘，為咗同佢鬧交，少咗好多陪貓貓嘅時間，呢一樣野，我一直都好後悔、好後悔。
其實佢途中都有氹我安慰我，不過真係唔多，因為佢理解唔到貓貓走出來究竟有幾傷心，佢話係因為自己冇養過寵物，所以共情唔到，不過我都feel到佢有努力去氹我。
跟住發生咗一件事，令到成件事去到一個冇彎轉嘅地步。係我隻貓走咗之後第二日，我同屋企人食完飯之後就即刻返咗去瞓覺，不過因為真係太攰同埋電話冇電，一上床就瞓咗，冇同女朋友報備要去瞓覺。跟住我醒返之後，咁啱佢都醒咗，佢屌到我上天花板。我一直同佢道歉，真係道咗好耐好耐，佢一直都唔肯理解，跟住我都頂唔順，同佢喺度嘈。但係嘈到一個點，真係覺得好攰、好辛苦，所以主動同佢提分手。
佢聽到之後即刻大發脾氣，將我喺英國屋企部電腦掟爛咗，又話要自殺。喺度同我講「唔通一隻死咗嘅貓，重要過佢
」。其實我真係已經好攰好攰，當下我真係好想放低晒我係英國嘅所有嘢，專心喺香港搞掂咗貓貓嘅嘢先。跟住搞咗一大輪之後，最後就改咗機票返嚟，一搞完白事之後，第二日就返咗嚟英國
。見到面之後，互相道歉互相氹，終於好似搞掂咗件事。我都有同佢講我原諒唔到佢，因為佢真係令我失去咗好多嘢，到而家我都覺得個心哽住哽住。而關於係咪繼續喺埋呢一樣嘢，我就好清楚咁樣同佢講同佢條件就係佢要改。
我明佢係有啲心理問題，所以當我人唔喺佢身邊佢就會焦慮大爆發，我知佢事後好努力去彌補，不過我真係覺得好辛苦、好攰。
佢有同我講佢好後悔佢所做嘅所有嘢同埋都應承咗買返部電腦俾我，跟住都會改返佢自己嘅行為、性格。呢一個月其實我都見到佢有努力去做、努力去改，不過其實我到而家都覺得好難受，雖然好愛佢，但係真係覺得好傷心，唔知應該點做好。
而家個心仲好亂，應該都有啲地方寫得唔係好清楚。
