TVB戀愛綜藝節目《女神配對計劃》星期日晚播出第一集，最受討論嘅場面應該係喺《愛‧回家之開心速遞》入面飾演島大女神Candy嘅葉蒨文Sophie，得到劇中飾演Mike嘅CP拍檔曾展望GM表白。曾展望直認對葉蒨文早有好感，甚至出「大絕」嚟氹葉蒨文，自爆「其實我同林子祥同一日生日嘅」。而葉蒨文喺《女神配對計劃》宣傳時曾經坦言理想型正是曾展望。終於喺表白環節，GM話「其實我好少可咁Hang機，畀個機會我追你，好唔好呀？」，Sophie零猶豫就直衝去GM並為佢戴上「心動頸鏈」
節目播出後，曾展望葉蒨文呢一pair成為熱話，唔少觀眾都話睇得好感動。不過有網民爆料，聲稱曾展望葉蒨文早已同居半年，並且經常喺荃灣嘅愛巢出入，引起議論紛紛。曾展望有份主持嘅TVB Plus節目《奇情谷》尋晚播出時，另一主持吳若希都問GM係咪已經同女神同居，GM回應話「我都想係，不過我未有咁嘅福份，多謝大家」。
唔少真人show早有劇本都唔係天方夜譚，因此好多網民都質疑《女神配對計劃》節目真確性。《女神》主持阿Bob（林盛斌）喺節目播出後發長文，否認一早有晒劇本，並就網民3大疑問作出回應。阿Bob又爆定之後集數嘅《女神》「所有人嘅故事發展係好X癲，充滿住笑聲、淚水、驚喜、失望、感動、反高潮」。
