28日歐遊之旅 法國篇 [live]

呢個係28日歐遊之旅嘅法國篇
有興趣睇我去意大利可以㩒下面條link
https://lih.kg/3937214

一開始我想分返post 易睇啲
但而家發現一次過post好似好啲
不過已經post完 返唔到轉頭

今次嘅法國之旅淨係去巴黎
冇去南法 下次再去

我哋搭08:40嘅飛機
06:40 已經到咗機場
check in counter都未開
所以去咗食個早餐



由於前一晚冇瞓覺
攰到爆炸
一上機就瞓 瞓醒就落機
連佢起飛同落地嗰下都唔知


到巴黎第一個反應係
咁撚凍嘅
明明上機之前仲係好熱
突然間咁凍 嚇親
我以為係因為落雨所以先凍
但原來係真係咁凍



我哋買咗Navigo嘅weekly pass
佢唔係計日數 佢無論幾時買都係星期日完
所以想買嘅人要小心啲
我哋係啱啱好最尾嗰日冇得用
但我發現啲法國人真係唔俾錢的
跨過去就算 我諗住最尾嗰日都咁
慳返啲錢


首先我哋返air bnb先
今次住得有少少偏僻
address link


個地鐵站好型

啲凳都幾污糟



Lunch

第一次食蝸牛 感覺幾有趣
食咗好多薯條 食物質素都一般
最後一人一個甜品
全部都幾好食
但係個朱古力慕絲超甜 唔太鍾意


跟住去咗睇巴黎鐵塔
幾型 但冇我想像中咁靚
可能係因為落雨



香榭麗舍大道

之前睇環法單車賽最後一站係呢度
覺得幾正 一直想行吓
就係一條大直路 隔離好多名牌店
最鍾意呢間LV 好突出


凱旋門

呢排已經睇太多凱旋門 周圍都係
諗住應該差唔多 原來大咁多 好型
我哋冇上到頂 因為plan咗聽日去睇日落
同埋我哋又攰又急尿 就走咗了

返到air bnb瞓咗一陣就出去食晚飯

Double cheese burger + ceaser salad
本身仲有舊扒 但佢漏咗單
返到去又即刻瞓覺
真係好眼瞓

好唔健康，法國可以食越南野

相反係越南就食越南餐

D 凳真係dirty
香港mtr真係好

淨係巴黎...仲要落雨, 哩入羅浮宮就啱哂

電子 weekly pass點買？

要download佢個app
應該要法國電話先買到
我之前喺香港整唔到

download完跟返佢啲Step嚟做就可以
買完可以加落Apple Wallet

就咁Apple Wallet係買唔到的
淨係買到其他

Day 9 _ 5/6 _ 巴黎

我哋買咗4日嘅museum pass
可以周圍睇

今日去羅浮宮
Book咗12:00入
但遲咗起身 差唔多時一點先到
原本有啲驚佢唔俾我入
好彩入到


入面嘅指示有少少唔清晰
一開始唔知應該點行
但行行吓就get到


睇咗羅浮宮三寶
蒙羅麗莎+ 勝利女神像+米洛的維納斯



同好多其他作品 全部都好靚

唔識藝術嘢 唔講咁多啦
我覺得羅浮宮三寶得勝利女神像係正嘅


跟住去咗附近一間餐廳食嘢
麻麻地


跟住去咗拉法葉百貨
好多名牌
順便睇吓巴黎歌劇院


跟住諗住去凱旋門上埋個頂
點知佢星期四唔開
所以就返屋企煮飯仔了

你好巴打 即係張sim卡無法國number都唔得？
咁即係要帶證件相買實體?

應該係
我之前用香港電話整唔到
原本諗住去買實體
去到巴黎用法國電話試多次就得了

我唔知我係唔係法國電話
買sim card送嘅 +33

哇, 遲咗咁多日, 仲以為你爛尾tin

唔係

Day 10 _ 6/6 _ 迪士尼

今日去迪士尼
好彩下晝開始就好天
琴日幾驚佢落雨

巴黎迪士尼有分Studio同Disneyland


Studio主要係玩attractions









Disneyland係有主題啲 打卡啲（我覺得差唔多）







我哋11:00先入園 去咗land睇Parade先

好睇過香港嗰個好多
但係啲dancer好似冇香港嗰啲咁有活力
最型都係嗰條噴火龍
估唔到有花木蘭
我冇乜影相 淨係拍咗片


跟住就去Studio玩 玩曬再返land
第一個game玩咗五星級大鼠
用老鼠嘅視角喺廚房走黎走去
又噴火又噴水 幾有趣



買咗隻老鼠 超級可愛



跟住去咗玩跳樓機


係鬼屋+跳樓機
全程都黑蚊蚊
跳跳吓有時會有鬼片睇
有一下會升到最高睇靚景
佢每次上落嘅距離都唔多
所以好快驚完


Spider-Man嘅game

佢sense我隻手嘅動作
伸手就可以射蜘蛛網
唔鍾意Spider-Man可以skip


巴黎版嘅米奇魔法書房
「冇圖」
香港好睇啲
音響勁啲 歌好聽啲 場景多啲 角色多啲


睇完就去返land食嘢同玩


幾有feel
唔洗自己搵位 買咗嘢食先可以入去
正常味道 又平 推介


仲玩咗好多 唔詳細講啦



特別嘅係Music live parade
超級有feel 超級正
啲鬼仔真係好識開party
成條街嘅人一齊拍手唱歌
啲cast member都一齊玩
好過香港嗰啲黑口黑面
好歡樂 睇到眼濕濕


跟住去咗揸車

童年回憶
唔知幾多年冇玩過
但已經唔覺得好玩了
好慢 要跟佢條線 仲會塞住

Space mountain
都係黑蚊蚊唔知去緊邊
但快過香港好多 仲會360度轉一圈
不過太快feel唔到轉咗
好玩的

最尾就去咗shopping等煙火
嗰度啲嘢比我想像中平
淨係貴香港幾十蚊

煙火
都係香港好睇啲
佢啲音響細聲啲（香港嘈到就嚟聾）
香港嗰個有鋪排啲 啲煙火會跟住音樂射
巴黎呢個係睇完都唔記得
冇乜記憶點
不過佢有無人機睇 香港冇

跟住就走了
Overall黎講係正的
有機會會再黎
好評


我返到airbnb先發現我拍片多過影相
所以冇乜圖

我咁大個佬都未去迪迪尼

今日我哋去凡爾賽宮

遠睇



近睇



Lunch €84

應該係我喺巴黎食過最好食嘅一餐

因為太遲book
所以book唔到12點嘅凡爾賽宮
要去後面嘅特里亞農宮先
我哋原本以為可以經凡爾賽宮後面個花園去特里亞農宮
但原來唔得
我睇過入面係有架車仔車我哋過去
可能係我搵唔到

佢成個花園都係噴水池表演
要俾錢先入得
所以我哋就要行外圍去特里亞農宮
超級遠 不過沿途嘅風景都幾靚




特里亞農宮嗰度有分三舊嘢
大特里亞農宮+小特里亞農宮+Queen’s Hamlet


我哋去Queen’s Hamlet先

佢係一個仿照鄉村風格打造嘅小村落，因為瑪麗皇后想遠離宮廷繁文縟節，過返一啲簡單自然嘅田園生活


跟住係小特里亞農宮

佢係由路易十五為佢情婦設計
都幾癲 起間嘢俾情婦
但原來嗰陣時情婦係被接受甚至有地位的
所以先可以咁光明正大


跟住係大特里亞農宮

路易十四覺得凡爾賽太煩，太多禮儀、官員，大特里亞農宮就變咗佢逃離凡爾賽嘅避風港，佢喺度可以輕鬆生活、約情婦、招待親密貴族


睇曬之後終於進入主題
凡爾賽宮

入面展示咗當時法國皇室生活嘅奢華
包括床、牆紙、地毯全部金光閃閃
周圍都係水晶吊燈、金箔雕刻、畫滿咗天花嘅畫







最出名景點就係鏡廳

我一直以為係中間有塊鏡影天花板
所以先叫鏡廳 但原來唔係
條走廊有17面大鏡
佢個特色就係嗰堆鏡
因為17世紀歐洲玻璃係奢侈品
仲要俾威尼斯壟斷
所以佢就請咗個威尼斯人黎整
幾把炮

路易十四間房

比我想像中細

最後就返屋企煮飯仔
紅酒燴雞

跟Chatgpt嘅recipe
睇落唔靚仔但比我想像中好食

小補充：
凡爾賽宮主要係俾人參觀同展示皇帝權威
唔係為住得舒服而設計
成座宮殿都冇廁所
嗰時啲人甚至會就咁係花園或牆角解決

而且個宮好似個loop
一定要兜好遠路先去到目的地
有時仲要經過路易間房先去到其他地方
都幾奇怪 不過路易十四就係鍾意俾人睇
彰顯佢嘅權威

Day 12 _ 8/6 _ 巴黎

今日去巴士底市集
佢淨係開星期四同星期日
呢度係啲local會去買嘢嘅地方
有海鮮 有芝士 有菜 有肉 有日用品




上網搵到一間食可麗餅嘅店
有甜有咸
我揀咗腸仔+芝士+洋蔥 €7
好食




跟住去睇巴黎聖母院+聖徒禮拜堂
我一直以為聖母院仲未開返

所以冇買入去嘅飛
去到先知入得
喺出面影吓相就算

聖徒禮拜堂



我之前睇YouTube片
啲人話好勁好靚
我覺得係幾靚嘅
但睇太多靚嘢
已經冇乜感覺
入到去就係俾啲彩繪玻璃圍住
佢仲有個細節位
圖嘅右邊係維修緊
佢整咗塊鏡喺出面
保持返個靚畫面

巴黎版萬神殿


都係打完卡走

奧賽博物館
佢原本係個車站黎嘅 變咗做博物館


入面有好多印象派嘅畫
同埋好多雕塑
主要係睇梵高同莫奈嘅畫
終於知咩係印象派
就係遠睇好靚 近睇唔知睇緊咩
因為佢哋畫畫係着重光影嘅變化







仲有其他畫
有一幅生命的起源 正嘢
Post唔到上嚟
你哋自己Google睇


跟住去咗食晚餐
係我個friend推介嘅Chartier

超級多人食 排咗九個字先入到
佢話超級好食 但我覺得正常
個侍應直接喺枱布落單同計錢
心算得好快 勁
食完出黎條龍又長咗好多 成條街都係



最後去咗凱旋門睇日落

巴黎總結

終於完咗巴黎5日4夜之旅
我都係鍾意意大利多啲
啲人nice啲 嘢食好食啲 天氣好啲
喺巴黎好似冇食過一餐係特別好食
我淨係記得油封鴨好食
同埋餐餐都要食唔熱嘅薯條
法國人真係好鍾意食薯條
值得讚嘅係佢啲交通幾方便 好多站
同埋迪士尼好正

我已經到咗西班牙三日
啱啱搭火車去Madrid先追得返巴黎嘅進度

28日歐遊之旅嘅法國篇完啦
有興趣睇我去西班牙可以㩒下面條link
https://lih.kg/3944506