MIRROR 12子出道至今，之前被劃分為上弦、下弦，現時就經常被分組行事，而經理人花姐經常被指「大細超」，偏愛ANSON LO(AL)，令不少其他「鏡粉」不滿，尤其是姜糖(姜濤的粉絲)，不過又真係好難怪啲鏡粉，話說正正日前姜濤、Edan、Stanley同Jer 4子出席粉絲見面會，足足玩咗幾粒鐘，攰到姜濤企到攣晒腰，而第二日Edan還搞到凌晨兩點幾先返屋企，第二朝晨早又要到機場出發為節目《膠戰》拍攝，「爵屎」見到都心痛。
不過有鏡粉就喺社交網指，當日花姐沒有到場，就只是跟AL到電台做訪問，做完訪問出來時，AL為了答謝於電台門外等足他幾粒鐘嘅粉絲(神徒)，由頭跑到尾同「神徒」SAY HI，而此時，花姐就在身邊拎住紙巾幫AL抺汗，慈母一樣。尋日AK喺同一電台訪問，又唔見花姐出現抹汗喎！AL被愛護的程度，又難怪其他鏡粉會呷醋。
