30歲，唔係咩特別值得慶祝嘅數字，但佢就好似一塊鏡，照住你行過嘅路，講緊你其實係咩人。呢篇文唔係成功學，唔係心靈雞湯，係我呢十幾年觀察、撞板、跌低再企返起身之後，得出嚟嘅10個反思。如果你都係一個醒唔晒但又唔甘心嘅人，呢啲嘢你可能會明。唔明唔緊要，因為你未大透啫！
1. 朋友要分類：有啲人唔值得再約第二次/再俾第二次機會
以前覺得朋友就係識得耐、有回憶、夠gag就夠。後來發現，有啲人根本只係你人生入面嘅負資產，見一次就攰一次。無止境咁講廢話、講人是非、抽你後腿——你唔會變好，只會變差。相反，有啲人見一次就開一次眼界，講兩句就想即刻做啲嘢，令你有動力成長。朋友要分類，唔係無情，而係你學識保護自己。2. 出身會影響機會，但你要識得分邊啲人講嘢先至有料
每個人出身都唔同，有啲人含住金鎖匙出世，有啲人就由零開始，資源唔一樣，條路自然唔一樣。細個淨係睇綜藝、偶像劇，大個之後好容易變到好被動——成日搵娛樂，搞到現實變得被人娛樂嘅犧牲品。
但最緊要記住一樣嘢：唔好乜人講嘢你都信。尤其係啲自己條人生路都未行得順嘅人。父母都一樣，佢哋唔會陪你行足一世，講嘅嘢唔一定啱晒。如果你老豆老母成日怨、唔醒目、冇動力，咁佢哋講乜你唔使當聖旨咁信。反而，如果佢哋係有智慧、識得輸、行得穩，咁你咪偷下師囉，學下點做人。
有啲人成日教人點做，但自己一世都喺度兜圈——嗰啲，聽聽下算啦。
一句講晒：近朱者赤，近墨者黑。你信邊啲人，你就會慢慢變成咩人。
分得清都唔夠，仲要識走。啲無謂的是非、爭拗、抽水、對嘴，全部唔好搞。無聊人最叻就係拉你落水陪佢玩情緒drama——你唔陪玩，你就唔會整污糟自己。
