馬鞍山真係蝕到執
其他執個d係傾唔掂續租
即係畀人加租啦
自從馬鞍山石門相繼公布會執笠之後，都不斷收到記者邀約訪問，對於呢類訪問，我哋一律婉拒，原因係我哋唔想用新聞角度放大執笠呢兩個字，生意賺蝕，冇得輸打贏要，大環境下人人都求緊生存，我哋絕對唔係僅有例子，我哋只想繼續默默努力，謝謝各位朋友體諒。
不過對於記者或者朋友仔之前留言想知道嘅問題，我哋都想借呢個機會為大家解答。
1）沙田友問馬鞍山、石門都相繼執笠，而家得返好運Pop up，沙田區會唔會開返一間？
🖊️其實好運都差不多就嚟租約到期，我哋好努力咁搵緊石門同區開返一間門市，希望好快會有好消息。
2）有留言問之前話馬鞍山輸八位數字，石門又輸幾多？
🖊️石門冇輸，只係新租金我哋交唔起，所以冇得續約，希望可以喺石門搵到一間租金較為相宜嘅舖頭。
3） 賣咁多Chiikawa點解仲要執笠？
🖊️Chiikawa 幫咗我哋好多，我哋儲多咗fans，多謝大家得閒就嚟巡鋪，如果冇Chiikawa，我哋每間舖都應該靜過太空。奈何大環境係大家都鍾意返鄉下、北上，逢假期香港都冇人，新嚟港人士又唔鍾意買香港嘢，最重要係租金並唔平，計唔掂數，就要壯士斷臂。
4）嚟緊仲有冇分店會執笠？
🖊️有，而且唔止一間，主要原因都係合約到期，租金傾唔掂。你以為經濟蕭條，可以同業主傾減租或者唔加租共渡時艱！？傻豬嚟嘅，依家梗係繼續同你傾加幾多租，唔續約就走啦，平俾你，銀行咪call 佢loan🥺，寧願吉咗佢都唔會平租。
5） 講到香港咁差，點解仲會繼續開新分店？
🖊️我哋要有足夠嘅營業額支撐背後back Office、倉庫、運輸等營運成本，除非我哋打算完全放棄準備執笠大吉，如果唔係，要養得起後勤就唯有努力搵生意，能夠搵到合適嘅分店開門就係最好嘅方法。
好老土但最真切嘅係，既然選擇咗留低，就要好好生活落去。到底而家呢個情況要守幾多年我哋唔知，而家係咪已經係最壞我哋亦都評估唔到，唯一知道嘅係只有努力堅持咬緊牙關，總會見到曙光。我哋下一個曙光係馬鞍山完約，起碼可以止蝕先。
文具佬石門同馬鞍山租約期滿，呢兩間分店現正進行執笠清貨優惠；買滿$100 9折、$200 8折，誠邀未嚟過嘅朋友趁未執之前過嚟行吓，特別係沙田、馬鞍山、白石角、大埔區附近嘅朋友請多多支持，多謝分享俾同區朋友知道❤️
