[本地足球] 2024/25 港超聯、亞冠二及香港隊討論區 (254)

曼聯3比1作客打敗港隊，奪得一個盃仔。
睇到一啲外國網頁言論，話曼聯對住業餘球員組成嘅隊伍，仲要失埋波。
呢啲都係為咗踩曼聯而出現嘅言論，為咗恥笑曼聯垃圾，故意老吹對手由漁民、農夫等等組成。
都有外國網友問我，係咪香港隊派出業餘球員？我話係呀，守門員Tse Ka Wing，係一名調酒員工，比賽當日還帶住宿醉，耍住醉拳去球場，雖然佢勇救多球，但其實已經醉了。
入球球員Juninho，係巴西燒烤店嘅員工，最喜歡吃巴西燒肉，Michael Udebuluzor正職係籃球員，綽號米高佐敦，喜歡入樽，Yue Tze Nam係一名魚販，最喜歡吃魚香茄子，Mahama Awal係一名外賣員，因為送餐時間超快，被英國無業遊民Westwood在街頭發現，召入港隊。
佢都係想要呢啲答案，同之前東南亞聯賽明星隊一樣，都有人話入選嘅係業餘球員，你認真同佢哋講，佢哋全部都係職業球員，入波球員貓貓麟由仰光聯起家，長期喺泰超發展。
佢哋唔會出聲話多謝晒你哋嘅資料同糾正，佢哋根本冇興趣知，佢哋只想笑鳩曼聯，所以畀啲弱智答案佢哋就啱，因為係佢哋想要嘅嘢。
最後我仲吹到港隊去大嶼山少林寺集訓，劉家喬懂得出波動拳以及半月刀，港隊畀我吹到每一個人都識輕功，全部喺維港用輕功飛過去大球場。
佢哋喜歡就得啦。