https://hk.on.cc/hk/bkn/cnt/sport/20250525/bkn-20250525171606904-0525_00882_001.html
港超聯 約滿離傑志 艾里奧:仲想踢多一季!
傑志周日(25日)在旺角大球場出戰「中銀人壽香港超級聯賽」最後一周賽事,與東方踢成1比1。因停賽只能作壁上觀的後衞艾里奧,賽後確認自己不獲球隊續約,來季將會離隊,惟他透露自己希望再踢多一季才退休。
39歲的傑志後衞艾里奧在對東方賽前,已被球會官宣將會最後一季效力,惟他因停賽關係,今場煞科戰無緣披甲。賽後艾里奧走到場邊與隊友逐一擁抱,隨後受訪時確認將會離隊:「上星期收到球隊通知,話唔會同我續約,但足球就係咁。我好興幸喺到效力過11年,傑志係一支好球隊,無錯今季我哋成績唔理想,但相信好快可以復甦。」
提到未來去向,艾里奧表現自己未有退意,盼來季繼續留在港超賽場:「我仲想踢多一季,但依一刻未同任何球會正式接觸。始終同傑志仲未完約,我會等完季之後先再作打算。」