沒有黎明的西貢

我叫阿謙，28歲，自由身攝影師，專接啲冇人想做嘅山旮旯Job——由元朗魚塘阿伯到長洲太平清醮影飄色，總之有錢就得。
今次個Job算係近期最正常：旅遊雜誌搵我影輯「香港自然奇觀」宣傳相，Budget夠我食一個月頹飯，仲可以順便去北潭涌踩下單車，諗住輕鬆Hea做。
點知，就係咁，我撻着咗個唔應該撻着嘅。。。
嗰晚我喺東壩set腳架，諗住影星軌。天氣報告話市區有煙霞，但西貢呢邊天清到癲，連銀河條光帶都見到。我開咗B快門長曝30分鐘，自己就攤喺石壩度睇連登，等運到。
突然，背後「沙」一聲，似係有人踢到碎石。我擰頭望，乜都冇。
「狗仔呀？」我拎起電筒照兩照，連隻蟻都冇隻。心諗可能係山風吹石仔啦，冇理到。
返到屋企沖相，張星軌靚到癲——但問題嚟喇：喺右下角嘅六角形岩柱旁邊，多咗個人影。
係一個著住舊式唐裝衫嘅女人，長頭髮，企喺度望住海，但個樣矇到打咗馬賽克咁。
「屌，PS執走佢啦……」我撳大個Mon想睇清楚，點知一Zoom近，成個背脊涼一涼——
個女人對手，係透明嘅。

第二日我拎住張相，去西貢碼頭附近間「勝記」問路。勝叔係我老竇個故交，成日吹水話自己識睇相睇風水，我諗住俾佢睇下係咪撞邪。
「勝叔，你睇下呢張——」
我未講完，勝叔一睇到張相，成塊面青晒，仲失手打瀉咗杯熱奶茶。
「……你喺邊度影㗎？」佢死死氣咁問。
「東壩囉，做個Job嘛。」
勝叔拎起張相，用指甲刮下個女人個位，跟住突然好嚴肅咁講：
「阿謙，你影到『嗰邊』嘅嘢。」
「吓？咩嗰邊呀？南海啊？」我仲想講笑，但勝叔直接拎咗樽符水出嚟，撳住我個頭叫我飲啖先。
「東壩死過人。」勝叔陰陰濕濕咁講，「有啲嘢困咗喺度，唔出得嚟……亦唔應該影到。」
我心諗：「又係啲老作都市傳說？」但勝叔跟住嗰句先至驚嚇——
「上個月都有個行山阿伯，話喺蚺蛇尖見到成隊日本兵行過……第二日，佢個孫女就失蹤咗。」

夜晚返到屋企，我諗住執相算數，點知喺背囊度摸到嚿硬物——一個我從來冇見過嘅銀懷錶。
懷錶嘅花紋古式古香，打開睇，入面冇指針，反而塞住一張發黃嘅舊報紙剪報，日期係1942年5月14日，標題係：
「西貢赤徑村百人離奇消失 日軍否認屠殺」
剪報下面，有人用鋼筆寫咗一行細字：
「門開之時，勿近六角之石。」
我拎起懷錶對燈照，突然聽到「滴答」一聲——
懷錶嘅秒針，竟然開始逆轉。

留個名

係咪已經全文完?

第二日，我拎住勝叔俾我嘅「線索」——一張霉爛到幾乎化嘅1942年西貢海圖，上面用紅筆圈住飯甑洲，仲寫住「聲が聞こえる」（日文：聽得到聲音）。
「喂，阿基，聽日可唔可以租你隻艇去飯甑洲？」我問碼頭個船家。
阿基原本仲笑笑口食緊煙，一聽到「飯甑洲」三個字，即刻擰頭：「屌，唔去！夜晚嗰度有日本仔講嘢㗎！」
「吓？你講緊二戰啲軍艦亡魂呀？」我扮輕鬆，但阿基個樣認真到爆。
「舊年有個YouTuber去嗰度拍片，錄到啲『呀依嗚欸』嘅日文，返到屋企把聲就沙晒，三日後失蹤咗。」阿基壓低聲線，「佢最後一段片，把聲變成咗……女人聲。」
我心諗：「又係啲老作都市傳說？」但個懷錶喺褲袋突然震咗一下，凍到我大腿一痺。
最後我掟多一千蚊，阿基先死死氣答應：「下晝三點前去，天黑前一定要走！」

好睇 支持

飯甑洲位置喺浪茄灣對住東壩，其實就係舊時日軍嘅沉船區，而家隱約見到幾碌生鏽炮管突出海面。我拎住部錄音機，開機五分鐘，正常到悶——直到我無啦啦收到一段頻道雜訊。
最初以為係附近漁船通訊，但愈聽愈唔對路：
「助けて……痛い……（救命……好痛……）」
「撃て！殺せ！（開槍！殺啊！）」
「あの女を止めろ——（阻止那個女人——）」
跟住係一連串尖叫同落水聲，仲有啲似鐵鏈拖地嘅「鏗鏗」聲。最恐怖係，段錄音最後突然靜晒，然後有把女人聲用廣東話講：
「你……睇到個懷錶未？」
我嚇到手震，成部錄音機跌落地。執返起時，段錄音已經變返正常海浪聲。
但SD卡入面，多咗個名為「1942.5.24」嘅WAV檔。

當晚我發高燒，成個人忽冷忽熱。半夢半醒之間，我見到自己企喺一個海灘，但啲海水係深紅色，仲有幾十個著住民國衫嘅村民浮沉喺度。
然後我見到佢——
嗰個喺我相片出現過嘅女人，企喺一堆六角形石柱中間，雙手捧住嚿發青光嘅石頭，嘴郁緊好似唸緊咒。
「門要開了……」佢突然望向我呢邊，對眼流緊血淚，「快啲走！佢哋會認得你個樣——」
我未問到「佢哋」係邊個，成個夢突然扭曲，轉場去一個日軍碉堡入面。有個著住軍服、塊面爛到見骨嘅男人，拎住把武士刀指住我：
「お前もあの女の仲間か？（你也是那個女人的同夥嗎？）」
我嚇到彈起身，成張床濕晒汗。而床頭個懷錶，正以倒轉方向急速轉動。

飯甑洲返嚟之後，我成個人散晒，連SD卡入面段詭異錄音都未敢聽第二次。勝叔見我面青唇白，塞咗碗符水煲豬骨湯俾我，話可以「鎮魂」。
我飲咗兩啖，苦到嘔，直接倒落碼頭海。
就係呢個moment——
「浪費符水，你嫌命長？」
一把冷冰冰嘅女聲從背後響起，我轉身，成個人僵咗。
係佢。
但同我影到嗰個著住民國衫嘅女人完全唔同款，而家企喺我面前嘅佢，著住件貼到爆嘅黑色運動外套，入面件酒紅色T-shirt仲要deep V，睇到鎖骨下少少，條貼身牛仔褲襯對短靴，成個造型型到爆。
佢把長黑髮俾海風吹到飛起，塊面白到好似冇血色咁，但個嘴又紅到似飲完人血咁。最撚死係對眼——杏眼仔，眼尾少少向上翹，對眼珠黑到好似黑洞咁，俾佢望住嗰陣，成個人好似俾X光機照緊咁，連我而家嚇到個心都離一離，都忍唔住吞咗啖口水。
「你……你係相入面嗰個人？」我退後半步，手已經摸向褲袋裏面把瑞士軍刀。
佢冷笑一聲：「你影到嘅唔係我。」
我未問清楚，佢突然一步逼近，身上有陣似檀香又似鐵鏽嘅古怪氣味。
「謙，」佢竟然講得出我名，「聽住，由今日開始，你delete晒所有喺東壩影嘅相，當冇事發生過。」
「點解？你知唔知飯甑洲——」
「除非你想同你影到嗰個『人』一樣，」佢打斷我，聲音壓到極低，「永遠留喺1942年。」
我個腦即刻閃過夢裏面嗰個血海場景，仲有SD卡入面段日軍慘叫錄音。但係我條硬頸脾氣上嚟，反而頂返佢：「你唔講清楚，我聽日就post上連登，等全香港人評理！」
我見到佢手臂內側，有個同我相片裏面嗰個透明手女人一模一樣嘅蛇形胎記，仲要微微發緊青光。
佢個眼神突然變得好悲哀，語氣突然急起嚟，「但如果你再追落去，好快就會變到同我一樣——」
碼頭突然傳來阿基把聲：「喂！阿謙你同邊個講嘢啊？」
我一擰頭，再轉返過嚟時，女人已經消失。
夜晚我反覆睇住手機偷拍到嘅女人相（佢警告還警告，我當然冇del到）。放大佢手臂個蛇形胎記，再對比我東壩相片裏面嗰個透明手女人——
我個手機突然收到條陌生號碼Whatsapp：
「聽日中午12點，東壩禁區牌等我。帶埋個懷錶。」

佢約我聽日下午去東壩，但係我等唔切。夜晚十一點，我直接踩上港大歷史系搵顧文瀚—佢係我大學嗰陣嘅論文導師，專研究二戰香港史。
「阿謙，三更半夜嚟搵我，你撞鬼啊？」顧教授開門時仲著住睡衣，副老花鏡掛喺心口。
我冇解釋，直接拎出懷錶同手機相：「教授，你知唔知1942年赤徑村發生過咩事？」佢塊面即刻變色，將門落鎖，帶我入去佢個禁書檔案室。
「呢單嘢，官方記錄係『日軍屠殺』，」顧教授從保險箱抽出一疊發霉文件，「但真相.....」
文件最頂係張泛黃嘅氣象圖，顯示1942年7月西貢東壩附近海域無端端出現20米高浪，但奇怪在一「個浪似係有生命咁，」顧教授手指戳住地圖，「淨係得赤徑村村民死，隔籬村冇人死。但係赤徑村並唔喺南海海邊。」
顧教授拎出本日軍少佐日記嘅影印本，指住段用紅筆圈住嘅內容：
「7月海神祭執行。六角石柱共鳴成功，浪高20米，實驗體No.1-103全數消滅•『門』暫時穩定。」
「實驗體？」我喉嚨一緊。
「即係赤徑村成條村嘅人。」顧教授冷笑，「日軍嗰陣喺東壩海底發現咗一組天然六角形石柱陣，但相信可以操控呢股能量嚟打開『門』。」
我諗起個女人話「門要開了」，成個人寒一寒。
「點解你咁清楚？」我盯住顧教授。
佢除低眼鏡，露出個古怪笑容：「因為我阿爺....就係當年負責記錄氣象嘅日軍翻譯官。」

離開大學時已經凌晨，我撳開懷錶睇—
入面嘅指針竟然變咗倒數日數：由40日變39日。
仲有一個月多啲。
我打開手機查天文台記錄，發現1942年同2025年嘅月相完全吻合。
手機突然震動，傳來Whatsapp訊息：
「聽日唔好去東壩。直接嚟赤徑村舊碼頭，帶多啲電池同鹽。」

我踩過霉爛嘅木板，每步都驚成隻腳插落海。佢企喺斷橋盡頭，拎住個古怪儀器對住海面掃描。
「電池同鹽呢？」佢頭都唔擰。
我遞過背囊，佢一打開就皺眉：「我要粗鹽啊，呢啲係餐桌幼鹽嚟㗎！」
「算。」佢突然撕開鹽包，成包倒落海。鹽粒同電池一齊接觸水面嗰刻，居然「滋」一聲激起綠色火花，海底即刻傳來一聲巨響。
我嚇到退後兩步：「下面......有嘢？」
「六角石柱呢道都有。」佢終於轉身，月光下佢塊面白到透明，嘴角有絲微綠色光澤。
佢拎出我影到嘅相片，指住透明手女人：「你問過好多次，呢個係邊個。」
「係你阿婆定阿嫲？」我盯住佢手臂嘅蛇形胎記，「胎記一模一樣。」
佢個表情好似俾人摑咗巴，突然將相片捏成一團：「 1942年赤徑村最後一個活人。日軍逼佢用六角石柱召喚獸封門，點知佢臨尾改咗咒語......」
海風突然變急，昭儀嘅長髮飛起，露出頸側一道猙獰疤痕——似係俾武士刀劈過。
我個懷錶突然瘋狂震動，彈開嘅錶蓋顯示新訊息：
「門開倒數：38日23時」
「點解你會知得咁清楚？」我按住懷錶。
佢望住海浪，聲音輕到幾乎聽唔見：
「因為我嚟自...... 講你都唔明，遲啲有機會先講。」
「你究竟叫咩名？」
「昭儀，沈昭儀。」
佢嘅鼻樑高挺，嘴唇薄而輪廓分明，不施胭脂卻自然透著一抹暗紅色，似係凍傷後嘅痕跡。海風吹拂下，佢嘅長髮隨風飛揚，髮絲黑得發亮，偶爾掠過臉龐時，更顯得佢下巴線條俐落，帶住一種冷峻嘅美感。佢嘅手指修長，骨節分明，手腕纖細隱約可見肌肉線條，好似隨時準備好應付危險。