如果你淨係睇住個數字既上上落落，咁你嘅人生就淨係得起起跌跌，冇咩靈魂。
反而我會問自己，呢隻股票背後係代表緊間點樣既公司？佢有冇幫緊世界變得更加好？呢樣先至係重點。
就好似Tesla咁，自動駕駛唔止係方便咗人搭車咁簡單。佢係改變緊我哋嘅生活模式，甚至係成個社會嘅運作方式。佢唔單止減低咗人類對勞動力嘅依賴，足夠平嘅運輸方式亦都可以產生新嘅行業同埋新嘅經濟圈。呢啲技術唔係單純為咗賺錢，同時都係造福緊人類。
當然係股市度，可能有人會話我傻，話我應該短炒快賺，但我會諗，長遠嚟講，人類嘅進步先係真正嘅回報。我炒股嘅背後係充滿着對人類以至世間萬物嘅熱愛。
又有人會話我買Tesla都只係益咗其他炒家，對間公司嘅R&D其實冇乜幫助，但係其實一間上司公司可以增發股票，可以用股票黎做抵押融資，可以用股票嚟獎勵佢既員工，股價嘅上升本身都係一種promotion。買佢地公司既股票對佢哋嘅工作絕對係有正面影響嘅。
投資都係一種價值觀嘅表現。我買嘅唔係淨係股票，而係呢間公司對未來嘅承諾，佢哋對社會嘅貢獻，仲有嗰種對夢想嘅執著。
當然，錢係要賺嘅，但如果可以喺呢個過程中推動到啲有意義嘅改變，種種嘅努力又會唔會更加值得？
用愛嚟炒股，用心嚟炒股，依個就係投資嘅最高境界。
