撰文：化外
【JOJO的香港冒險】
開埠僅僅幾年之後，祖奧成為咗家族中最早移居香港發展嘅成員。佢嚟自被稱為「土生葡人」（即係喺澳門落戶嘅葡萄牙人）嘅布力架家族，隻身嚟到香港打工。
重要嘅係，祖奧全名叫做João Joaquim Rosa Braga，所以技術上嚟講，佢都係一個JOJO。
當時，葡屬澳門已經有近三世紀歷史，佢同啱啱開埠嘅英屬香港，就如同兩架並排喺紅燈前發出俸俸聲嘅跑車🚦🚘🚘，準備喺商業港口嘅地位上競爭。
早期由於澳門嘅發展遠較香港完整，香港嘅歐裔族群無論係求醫定係賽馬，都需要搭船去澳門。反過嚟講，僅僅一岸之隔嘅發展機遇，亦吸引咗許多從澳門而嚟嘅資本，祖奧做嘢嘅維多利亞大藥房，最初正正係先喺澳門開業。
事實上，香港嘅貿易發展很快就超越澳門，有論者甚至主張，香港帶來嘅經濟威脅，刺激咗澳門博彩業嘅合法化。
但呢啲嘢同祖奧嘅關係可能越嚟越細：因為佢無耐已經喺香港頂讓咗另一間藥房，事業有所成就。呢一切，都有賴佢嘅辛勤拼搏──
或者亦有賴佢嗰個有錢嘅老婆。
