隨住英國政府將於2025年4月取消長年存在嘅「Remittance Basis」（匯入制），一眾依靠海外收入生活嘅港人移英族群陷入稅務風眼。根據新制，即使海外收入唔匯入英國，只要成為稅務居民，都一律需要報稅。無論你係收租、炒港股、美股、Bitcoin，只要你住喺英國，就走唔甩要交全球稅。
喺英國稅網即將全面收緊之際，近年越來越多高資產港人開始留意一個選項：Isle of Man（曼島）。呢個位於英格蘭與愛爾蘭之間、人口僅八萬嘅細島，雖然地理上接近英國，但稅制卻完全獨立，變成港人新避稅天堂。
曼島唔係英國。雖然政治上屬於英國王室直轄嘅 Crown Dependency（皇家屬地），但曼島有自己嘅政府、法律、醫療同稅制，完全唔受 Westminster 或 HMRC 所約束。最吸引之處係，曼島唔徵收資本增值稅、唔徵收股息稅、冇遺產稅，連加密貨幣獲利都無須申報。換言之，港人只要搬去曼島，就算每日炒美股、收港股息、買賣Bitcoin，全部利潤都唔需要交一毫稅。
相比起英國本土現時CGT上限28%、股息稅上限33.75%、遺產稅40%，曼島無疑係徹頭徹尾嘅稅務避風港。而最令人震驚嘅係，持有BNO或者British Citizen護照嘅港人，完全唔需要申請簽證、亦唔使經過移民計劃，就可以合法搬入曼島居住。
唔少港人對曼島誤會以為係英國一部分，其實兩者法律地位唔同得好遠。曼島唔屬英國、唔係UK稅務範圍，亦唔受英國國會控制，仲可以自己立法。佢同 Jersey、Guernsey 一樣，屬於極少數擁有英國護照但又唔需要被英國政府抽稅嘅地區。
搬去曼島，亦唔代表生活會斷水斷電。曼島雖然係細島，但擁有自己嘅機場，有直航飛倫敦、曼城、都柏林。當地超市、銀行、學校、醫院一應俱全，生活指數比倫敦仲平。你可以繼續用 Revolut、Monzo、Barclays，甚至連 BT 上網都得。只要習慣佢比較慢嘅步伐，基本上一樣過到城市生活。
至於醫療方面，曼島有自己獨立嘅 Manx Care 醫療系統，唔係 NHS，但持英國護照住民一樣可以免費睇 GP、睇急症。雖然選擇冇咁多，但基本醫療服務仍然完善，甚至可以轉介返英國本土做大型手術。
當然，曼島都唔係完美。佢最大嘅限制係物流同零售選擇比較窄，網購有時要額外付運費。再者，天氣比英國本島更濕冷，冬天夜長日短，心理上要有準備。唔適合短期中轉，但就非常適合想長期收息、退休、自由投資嘅人。
曼島嘅物業市場相對細，但外國人可自由買樓、冇限制轉售。大部分人選擇租樓過活，每月£800–£1,200已經可以租到兩房單位。若果一家人一齊搬過去，每月生活開支約 £1,500–£2,000，遠低於倫敦、中部甚至威爾斯及蘇格蘭。
仲有一樣係大多數人都忽略，但其實關鍵致勝位：曼島係冇遺產稅！喺英國，如果你過身，遺產（包括海外資產）一旦超過 £325,000，就可能被抽高達 40% 遺產稅。即係你辛辛苦苦儲到1,000萬港元，最後政府劈走成4,000,000。
但你如果係曼島稅務居民，無論你持有幾多資產、股票、物業，死後都唔使畀一毫稅！ 可以 100% 留俾下一代，零干預、零遺產報稅、零資產凍結風險。
尤其對於已經財務自由、有子女、有資產傳承計劃嘅人，曼島就係英國體系入面唯一可以合法避開遺產稅嘅地區，完全唔使做 Trust、唔使做 Offshore 結構，住喺度就得。
總括而言，當英國主島稅務制度愈嚟愈緊，曼島就變成咗一條「合法避稅但唔使跑路」嘅黃金走線。只要唔超過英國稅務居留日數（通常係每年唔超過46日），你甚至可以住喺曼島、間中返英格蘭玩下都唔影響非居民身份。對一班靠投資、靠收息過活嘅港人嚟講，曼島可能就係最完美嘅 Plan B。
