9日北九州自駕一圈遊記

今次北九州周遊Plan左差唔多半年，原本打算係櫻花季去，只不過因為唔夠AL 唯有硬食復活節貴機票+無櫻花

行程
Day1: 福岡落機->糸島glamping
Day2: 海洋世界海之中島 -> 宿由布院溫泉
Day3: 阿蘇山->宿高千穗
Day4: 高千穗->宿熊本
Day5: 熊本城 -> 宿雲仙溫泉
Day6: 長崎近郊 -> 宿豪斯登堡
Day7: 佐世保+ 佐賀 -> 宿福岡
Day8: 門司港
Day9: 福岡回港

Day 1
香港->福岡->糸島

係機場食個超頹burger king做早餐，唯一優點係大大份夠飽肚。


出發啦～ 今次搭UO668，朝早十一點出發、下晝三點半到福岡。3個半鐘左右坐HK express其實幾適合。


福岡機場入境超快，半個鐘左右已經出到黎，係Times car 租車反而等左成粒幾鐘。之後就直接飛車去糸島。

今晚住糸島Glamping SDGs Village 地球Mirai。個位置其實同糸島啲景點有啲距離，不過勝在係海邊，（天氣好嘅話）風景好靚。可惜當日陰陰地天，夜晚仲要開始落雨+超大風，影唔到靚相。


原本book左呢架露營車，不過check-in之後發現有三大問題：
1. 架車細到pk
2. 廁所浴室廚房全部唔比用，要行30米經大草地去返圓頂帳篷區先有廁所浴室
3. 露營車出面嘅燒烤爐因為大風無得用，晚餐BBQ要去返圓頂帳篷區


結果我地問staff圓頂帳篷仲有無空房，好好彩當日有兩間，比我地補錢升級呢間圓頂帳篷。

呢間帳篷叫Grand Blue，係用海洋主題，中間仲有個魚缸。

配合個海景簡直一流（特別係天氣好）。

晚餐係BBQ，個燒烤爐廢左啲，兩隻雞髀燒左成粒鐘先熟。


結論：好彩升級左做圓頂帳篷，成個體驗高左幾個level。

Day2
海洋世界海之中島->Lalaport->由布院

第一晚落左成晚雨，第二朝趁有小小停雨即刻揸車返福岡。揸左九個字，目的地係海洋世界海之中島。


成個館最好睇應該就係中間嘅大魚缸。


企鵝都好得意。


海豚表演都ok，感覺同海洋公園差唔多。


去完水族館之後，去lalaport買兩件衫仔保暖（本身睇天氣預報無咁凍，點知又大風又落雨又凍），順手例牌影下高達。


揸左大約個半鐘車程後到達由布院，已經係下晝四點鐘，B-speak已經無曬蛋卷，求其買個芝士蛋糕就出發去今晚嘅住宿。
（芝士蛋糕如圖，味道小伏）


今晚嘅住宿係連登仔推薦嘅御宿·由布乃莊。Book左有岩風呂半露天風呂嘅和室。$2300一晚嘅價錢黎講值100分。


晚餐係返入去母屋度食，一埋到去已經上好曬啲前菜同燒烤拼盤。豐厚牛好有牛味。


第二樣主食係雞煲，食完雞肉後，女將會加米落去煲成粥。煲粥吸收曬雞肉同野菜精華，鮮甜香俱全。


Side dish 有樣係烤焗牛奶，表皮脆脆地，皮下面食落好香牛奶味。


食完晚餐之後就係不斷浸溫泉。外面嘅貸切風呂浸下，房入面嘅岩風呂又浸下。

LM

LM
GLAMPING SDGs Village-地球MIRAI 之前見人介紹過
價錢都唔平成千幾蚊一晚
但睇返啲評價好壞參半咁
個view幾好但配套唔太好
想知你住完之後覺得值唔值

1. 交通真係搞唔掂：唔自駕完全唔知點入去，就算自駕最後1km入去條路窄到不得了，好彩出入都無對頭車。

2. 雖然check in果陣送左張附近錢湯嘅免費券，錢湯隔離又有間餐廳，但係我新仔司機夜晚真係唔係好夠膽揸個條路。

3. 圓頂帳篷本身無廁浴。4個圓頂帳篷share三個廁所+三個浴室。好彩日本嘅廁所浴室潔淨標準一向高，至少如廁沖涼都舒服。

4. 露營車車完全唔得掂，千其唔好試。

5. 野食方面就焗住食佢啲BBQ，食材就都係普通BBQ料質素，最慘個爐又廢，價錢set又好單點又好價錢都貴。

優點係海邊風景+帳篷內裝都係一流，夜晚聽住啲海浪聲訓其實幾有feel。

值唔值就真係睇天氣

lm

Day3
御宿由布乃莊->阿蘇->高千穗

朝早起身先食返個100分嘅早餐。小菜沙律煎魚鍋物全部一流，連塊紫菜都特別好食。仲有大大煲白飯任你食到飽。


由由布院到阿蘇車程大約一個鐘多啲，日本啲郊區國道其實幾好揸，只不過最後由大觀峰落山段路有幾個髮夾彎，揸落去都幾驚下，特別係對面線有大車嘅時候。

到達阿蘇先去asomilk factory 整返杯阿蘇牛乳+雪糕，雪糕甜度適中奶味濃郁，但係阿蘇牛乳陣膻味有啲唔太啱我口味。


今次book左ARIair嘅直升機觀光飛行，雖然價錢係草千里直升機嘅兩倍，但好處就係有得book定唔洗朝早鬥快攞籌。

原本以為停左雨實無事，點知臨到步收到通知話阿蘇山有颱風級嘅狂風，最後都係比人取消左個booking，唯有係仙醉峽影張相就走人上阿蘇山。


去到草千里又係同樣情況，大風+凍到不得了。原本打算騎馬，只不過見到成個草原一隻馬都唔無+連個馬場都空空如也就知咩事了。


兩樣阿蘇必玩嘅嘢都玩唔成唯有直上阿蘇山口，山頂溫度接近0度加埋八號風球級別嘅狂風，封山期上雪山應該就係呢個感覺。


火山口大煙到咩都睇唔到。


局部融化嘅積雪形成一條條嘅班紋，令到成個景觀好有特色。


最後往南阿蘇落山途中有個展望台，可以一眼望曬成個南阿蘇火山灰平原。



到達高千穗後先去今晚嘅酒店check-in，頹商務旅館一間就唔特別介紹了。

晚餐係高千穗牛燒肉·和。排隊等左差唔多一個鐘先有得食，但係絕對值得等嘅。呢塊高千穗牛西冷應該係我食過最好食嘅牛扒，牛味重，油而不膩，真正入口即融。仲要200g 西冷set 都係$300港紙左右，超級抵食。


食完出黎已經係夜晚，一抬頭就望到無數嘅星星，睇黎高千穗完全係0光污染，觀星一流。

Lm

Lm ,想知total 揸左幾km,同行幾多個揸

lm

支持

lm

揸車個7日total 大約820km，得我一個揸。

Day4
高千穗峽->天安河原->熊本

簡單食左個lawson早餐就出發去高千穗峽，最近划艇嘅停車場一早就已經full曬，要去高千穗峽另一邊嘅停車場。一路行返去划艇度當行左步道一次。



原來高千穗峽係阿蘇山爆發嘅熔岩冷卻後受河水沖刷而形成。係香港睇唔到嘅景觀。


途中會經過划艇嘅場地，上面睇落去仲靚過係下面睇出黎。


係艇仔度影上黎係咁嘅樣。（大部分心機都擺左係操縱架碰碰船度）


(Day4 待續)

Day4 （續）

划完艇仔之後，流水麵已經排曬長龍，唯有去隔離嘅千穗之家食頹餐。一個鰻魚飯定食加個陶板燒牛，又貴又難食。


食完出黎撞正祭典。


睇完就去下一站天安河原，20分鐘車程後由停車場步行15分鐘就到達呢個隱秘洞穴嘅入口。


到達嘅時間啱啱好係正午，洞外洞內嘅光影對比明顯，行入去洞入面空間寬闊，有幽靜神秘嘅感覺。


由天安河原揸2個鐘頭嘅車程就黎到熊本市，Check-in左grand fresa 之後就去左勝烈亭食炸豬扒。 呢塊炸豬扒外脆內軟，脆皮酥香而唔油膩，肉質紮實軟嫩。應該我食過最好食嘅炸豬扒。

咁多日竟然唔揸埋去南九州?

LM

lm

想問樓主糸島啲路好唔好揸，糸島啲景點好散，諗緊揸唔揸車

Day5
熊本城->雲仙溫泉

朝早起身衝去 黑亭 食熊本拉麵。味道同味千拉麵一模一樣，中曬伏。順帶一提成條熊本商店街都係冷冷清清咁樣。


食完拉麵就入熊本城，熊本城係2015 年地震時受損，宜家得一條通道行入去天守，沿途都可以見到修補嘅痕跡同施工嘅工地。



天守基本上就係一個博物館，介紹熊本城由戰國時代開始到近代嘅歷史。上到頂樓可以望出去睇曬成個熊本市嘅風景。


行完熊本城就去左隔離櫻町商場shopping，見到一隻熊本熊版嘅Monchhichi，可惜係非賣品。


最後由熊本港搭汽車渡輪向島原半島出發。


(Day5 待續)

我無去到糸島嘅景點所以唔知，不過應該好揸過阿蘇/高千穗/雲仙嘅山路好多好多。福岡出入糸島嘅話，有福岡都市高速+西九州道就幾方便。

9日玩得晒成個九州？

點解無介紹下架車

嚟緊九月福岡自駕遊都係租咗Times ，我喺Klook租嘅，因為我唔識講日文，想問吓到時去到機場Times嘅櫃檯，用櫃檯嘅電話打過去，聽電話嗰個係咪識聽英文？
第一次租車，想知落機之後點樣聯絡租車公司