但係好難估到有時人哋狀態差，只係講錯一兩句就激嬲人哋
，而學識點樣避開就係生活之中嘅呃of刁
，喺度我帶返個頭盔，以下所有例子僅供參考，無可能靠幾句說話就可以世界和平，有請真係識嘅人例如讀社工之類嘅你哋多啲同身邊人分享你哋嘅技巧，唔好收收埋埋，大家都識處理就會幸福好多
1.講野時候顧及對方立場
情境一:
香城中學生疑早會食麵包被阻 擸木工雕刻刀傷害班主任被捕
***情境意圖等大家更加容易代入，以下並非真實情境，大家請唔好做判官***
如果你好肚餓，忍唔住要喺早會食早餐，而阿sir見到就叫你唔好食，「假設」你好有需要維持你嘅立場，咁你應該點樣講?
高危反面教材，如何用一句話激嬲人:
「肚餓梗係要食野㗎喇」
「阿Sir你想餓死人咩」
「我肚餓點解唔可以食啊?」
上面嘅反面教材問題來源就係自我中心，平時大部分情況無事，有啲老師仲識講下笑，不過本身已經燥底壓力大嘅人可以聽完發你火，你或者會怪對方廢(老師普遍包容力真係高啲)，但係如果激嬲咗一個真白卡，真正蝕底嗰個係你，就算俾你呦贏，最後嘈完你哋之間嘅關係受損嘅機會率好大，就算唔受損，你嘈完嘅心情都一定無咁好
畀幾行時間你思考一下，如果喺「顧及關係」嘅前提之下，你係學生，你仲想堅持食早餐，你會點同老師講?
「Sorry，我知早會唔食得野，但係我真係好肚餓，食多啖就唔食啦」
「對唔住，要你難做，但係我真係好有需要食啲野」
「阿Sir我自首，因為我實在太肚餓啦」
***以上回答僅供參考，唔係用嚟破壞校規，真係就快餓暈先會企呢個立場***
咁樣答嘅思路核心，在於話俾對方知我有考慮到你(作為老師)嘅立場(維持校規)，我會讓步，但係好明顯，如果你繼續食，咁唔畀面，跟住通常都係一定會起衝突，唔係話你講完就天下無敵，你一定要做啲行動去配合，天下無免費午餐就真
依家角色調返轉，假設你係老師，見到有個學生喺早會食野，個樣仲串串貢，如果俾校長見到實捽死你，你又可以點樣同個學生講叫佢唔好食呢? 又畀幾行時間你
「你做咩食野? 唔准食，即刻停手，冇話過俾你食，再食就記缺點」
「XXX，我幾時俾你食野? 早會俾你食野㗎咩? 沒收，你依家同我攞出嚟畀我」
Sorry，呢個係反面教材，個學生咁啱呢排壓力爆煲，覺得你連食少少野都唔俾，根本冇當佢係人，就算佢要入男童院依家都要攞刀拮你
..
...
重新思考「顧及關係」嘅關鍵，就係考慮對方嘅立場，如果你係老師，點樣考慮一個學生喺早會食早餐嘅立場呢? 佢唔生性? 佢好肚餓? 佢要食藥? 作為老師要維持秩序仲可以點讓步?
「XXX，你係咪好肚餓? 定係需要食藥墊肚? (佢答真係好肚餓) 我俾你最多1分鐘時間食埋佢，食唔完就由佢，因為你已經足夠，你其實唔可以喺早會食野」
「你食咗嗰幾啖我當睇唔到，只要你依家停手唔食落去我就唔罰你當睇唔到」
「請你忍多陣，唔好喺度食，喺度食我真係會罰你」
***僅供參考***
作為老師可能會遇到有啲學生嘗試利用你嘅仁慈最大化自己嘅利益，所以有時候你或者會選擇強硬啲，最後可能會起衝突，關係受損，但係我用意唔係想叫大家避開所有衝突，而係去避開「不必要」嘅衝突(大部分真係不必要)，如果真係發生衝突，我會建議大家吸一口氣，穩定自己情緒，唔好俾情緒過份影響，再去處理
bookmark咗每日都會睇幾次
(顧及對方感受)
